તિરુવન્નામલાઈ 26 જૂન 2025: શું કોઈ પિતા પોતાની સંતાનોના વર્તનથી એટલા દુઃખી થઈ શકે કે પોતાની કરોડોની સંપત્તિ તેમને આપવાને બદલે મંદિરને દાન કરી દે? તમિલનાડુના તિરુવન્નામલાઈ જિલ્લામાં આવી જ એક હૃદયદ્રાવક ઘટના સામે આવી છે, જ્યાં એક નિવૃત્ત આર્મી ઓફિસરે પુત્રીઓના અપમાનથી કંટાળીને પોતાની 4 કરોડ રૂપિયાની કિંમતની સંપત્તિ મંદિરના ચરણે ધરી દીધી છે.

સેનાના નિવૃત્ત અધિકારી એસ. વિજયન છેલ્લા કેટલાક સમયથી તેમની પુત્રીઓના વર્તનથી અત્યંત નારાજ હતા. સૂત્રો પાસેથી મળતી માહિતી મુજબ, તેમની પુત્રીઓ તેમને સંપત્તિ સોંપી દેવા માટે દબાણ કરતી હતી અને દૈનિક ખર્ચાઓ માટે પણ તેમને અપમાનિત કરતી હતી. આ અપમાન એટલું વધી ગયું કે વિજયને એક આશ્ચર્યજનક નિર્ણય લીધો.

અરુલમિગુ રેણુગંબલ અમ્માન મંદિર પ્રશાસનના જણાવ્યા અનુસાર, 24 જૂને જ્યારે મંદિરની દાનપેટી ખોલવામાં આવી, ત્યારે સૌ કોઈ ચોંકી ઉઠ્યું. સિક્કાઓ અને નોટોની સાથે, તેમાં બે મૂળ સંપત્તિના દસ્તાવેજો પણ મળી આવ્યા. એક સંપત્તિ 3 કરોડની હતી અને બીજી 1 કરોડની. આશ્ચર્યની વાત એ હતી કે આ દસ્તાવેજો સાથે વિજયનનો એક પત્ર પણ હતો, જેમાં સ્પષ્ટપણે લખ્યું હતું કે તેમણે સ્વેચ્છાએ આ સંપત્તિ મંદિરને સમર્પિત કરી છે.
વિજયન, જેઓ રેણુગંબલ અમ્માનના કટ્ટર ભક્ત છે અને છેલ્લા 10 વર્ષથી એકલા રહે છે, તેમણે જણાવ્યું કે, "મારા બાળકોએ મને મારા પોતાના ખર્ચ માટે પણ ઠેસ પહોંચાડી. હવે હું આ મિલકત એ દેવીને સોંપી રહ્યો છું જેણે મારા જીવનભર મને ટેકો આપ્યો."
જોકે, આ મામલે કાયદાકીય પેચ પણ છે. મંદિરના કાર્યકારી અધિકારી એમ. સિલમ્બરાસન એ સ્પષ્ટ કર્યું કે માત્ર દાનપેટીમાં દસ્તાવેજો મૂકવાથી કાયદેસર રીતે સંપત્તિનું હસ્તાંતરણ ગણી શકાય નહીં. જ્યાં સુધી દાતા નોંધણી વિભાગમાં યોગ્ય રીતે નોંધણી ન કરાવે ત્યાં સુધી મંદિરને કાનૂની અધિકારો મળશે નહીં. હાલમાં, આ દસ્તાવેજો હિન્દુ ધાર્મિક અને ચેરિટેબલ એન્ડોમેન્ટ્સ વિભાગ પાસે સુરક્ષિત રાખવામાં આવ્યા છે, અને વરિષ્ઠ અધિકારીઓ આગળની કાર્યવાહી નક્કી કરશે.
હવે આ મામલો સાર્વજનિક થતાં, વિજયનની પુત્રીઓ મિલકત પાછી મેળવવા માટે પ્રયાસો કરી રહી છે. પરંતુ વિજયનનો નિર્ણય અડગ છે. તેમણે સ્પષ્ટપણે કહ્યું છે કે, "હું મારા નિર્ણયથી પાછળ હટીશ નહીં. હું મંદિર સાથે વાત કરીને કાનૂની પ્રક્રિયા પૂર્ણ કરીશ."
શું વિજયનને ન્યાય મળશે અને તેમની દાન કરેલી સંપત્તિ ખરેખર મંદિરની થશે? કે પછી પુત્રીઓ કાયદાકીય રીતે તેને પાછી મેળવી લેશે? આ ઘટના સમાજમાં વૃદ્ધ માતા-પિતા પ્રત્યેના વ્યવહાર અને સંપત્તિના મોહ પર ગંભીર પ્રશ્નો ઉભા કરે છે.