ઇટાવા, ઉત્તર પ્રદેશ 26 જૂન 2025: ઉત્તર પ્રદેશના ઇટાવા જિલ્લામાં કથાવાચક મુકુટ મણિ યાદવ અને તેમના સાથી સંત કુમાર યાદવ વિરુદ્ધ FIR નોંધવામાં આવી છે. કથાવાચક પર એક મહિલા સાથે છેડછાડ કરવાનો આરોપ લાગ્યો છે, સાથે જ ઓળખ છુપાવવા, ધાર્મિક ભાવનાઓને ઠેસ પહોંચાડવા અને છેતરપિંડી જેવા ગંભીર આરોપો પણ મુકવામાં આવ્યા છે. આ સમગ્ર ઘટનાને લઈને ભારે હોબાળો મચ્યો હતો અને બંને પક્ષો પોલીસ અધિક્ષકની કચેરીએ પહોંચ્યા હતા.

શું છે સમગ્ર મામલો?
ઇટાવા પોલીસ દ્વારા આ કાર્યવાહી ત્યારે કરવામાં આવી છે જ્યારે કથાવાચક મુકુટ મણિ યાદવ અને તેમના સાથી સંત કુમાર યાદવ સાથે મારપીટનો એક વીડિયો સોશિયલ મીડિયા પર વાયરલ થયો હતો. આ મારપીટ બાદ ચાર લોકો વિરુદ્ધ FIR નોંધવામાં આવી હતી અને તેમને જેલમાં મોકલવામાં આવ્યા હતા. આ કાર્યવાહીથી બ્રાહ્મણ સંગઠનોમાં નારાજગી હતી, જેમનું કહેવું હતું કે એકતરફી કાર્યવાહી થઈ રહી છે અને છેડછાડના આરોપી કથાવાચક પર કાર્યવાહી કેમ નથી થઈ રહી.

મહિલાએ શું આરોપ લગાવ્યો?
કથાવાચકો વિરુદ્ધ FIR કરાવનાર વ્યક્તિનું નામ જયપ્રકાશ તિવારી છે. જયપ્રકાશની પત્ની રેણુ તિવારી સાથે કથાવાચક મુકુટ મણિ યાદવ પર છેડછાડ કરવાનો આરોપ છે. આરોપ છે કે આ ઘટના બાદ જ વિવાદ થયો અને કેટલાક છોકરાઓએ મુકુટ મણિ અને તેમના સાથીઓને માર માર્યો હતો.
પોલીસને આપેલી ફરિયાદમાં, બકેવરના દાંદરપુર નિવાસી જયપ્રકાશ તિવારીએ આરોપ લગાવ્યો છે કે કથાવાચક મુકુટ મણિ અને તેમના સાથી સંત કુમારે ખોટું બોલીને પોતાને બ્રાહ્મણ ગણાવ્યા હતા. તેમણે નકલી આધાર કાર્ડ બતાવીને પોતાની ઓળખ અને જાતિ છુપાવી. જ્યારે હકીકત સામે આવી ત્યારે ખબર પડી કે મુકુટ મણિ અસલમાં મુકુટ સિંહ યાદવ છે અને સંત કુમાર, સંત સિંહ યાદવ છે.
ફરિયાદમાં એમ પણ કહેવામાં આવ્યું છે કે કથાવાચકે બનાવટી (નકલી) આધાર કાર્ડના માધ્યમથી પોતાને બ્રાહ્મણ ગણાવ્યા, ધાર્મિક આસ્થાને ઠેસ પહોંચાડી અને ગામલોકો સાથે છેતરપિંડી કરી. આથી, આરોપીઓ પર કાનૂની કાર્યવાહી અને ગુનો નોંધવામાં આવે. આ બાબતે કથાવાચક દ્વારા બતાવવામાં આવેલું નકલી આધાર કાર્ડ પણ પુરાવા તરીકે સોંપવામાં આવ્યું છે.