News of Friday, 27th June 2025
અમદાવાદમાં જગન્નાથજીની રથયાત્રા દરમિયાન અણધારી ઘટના : ખડિયા ગોલાવડ પાસે ભીડ જોઈને હાથી બેકાબૂ બન્યો : સર્જાઈ અફરાતફરી; વન વિભાગ અને ઝુ ની ટીમે ત્વરિત કાર્યવાહી કરી પરિસ્થિતિ પર કાબૂ મેળવ્યો : એક યુવકને ઈજા :જુઓ વિડીયો
શહેરીજનોમાં ગભરાટ ફેલાયો : લગભગ ૧૫ મિનિટ સુધી થંભી રથયાત્રા : મેડીકલ ટીમે હાથીને ઇન્જેક્શન આપી શાંત પાડ્યો : ઘાયલ યુવકને તાત્કાલિક હોસ્પિટલ ખસેડાયો : પ્રશાસનની સરાહનીય કામગીરીથી યાત્રા ફરી શરૂ કરાઈ

અમદાવાદ, શુક્રવાર, ૨૭ જૂન, ૨૦૨૫ : અમદાવાદમાં પરંપરાગત રીતે નીકળતી ભગવાન જગન્નાથજીની ભવ્ય રથયાત્રા દરમિયાન આજે ખડિયા ગોલાવડ વિસ્તારમાં એક અણધારી અને ભયાવહ ઘટના બની હતી. રથયાત્રામાં સામેલ એક હાથી, માનવ મહેરામણ અને અનિયંત્રિત ભીડ જોઈને અચાનક બેકાબૂ બની ગયો હતો. હાથીના આકસ્મિક રીતે બેકાબૂ બનવાથી યાત્રામાં હાજર હજારો ભક્તો અને દર્શનાર્થીઓમાં તીવ્ર ગભરાટ ફેલાઈ ગયો હતો, જેના પરિણામે નાસભાગ જેવી સ્થિતિ સર્જાઈ હતી.
પ્રાપ્ત માહિતી અનુસાર, આ ઘટના ખડિયા ગોલાવડ નજીક બની હતી, જ્યાં હાથીએ અચાનક વિચિત્ર વર્તન કરવાનું શરૂ કર્યું. ભીડ જોઈને તે વધુ ને વધુ અશાંત બનતો ગયો અને પરિસ્થિતિ એટલી હદે વણસી કે આસપાસ ઊભેલા લોકોમાં જીવ બચાવવા માટે દોડાદોડ શરૂ થઈ ગઈ. આ ઘટનાના પગલે રથયાત્રા લગભગ ૧૫ મિનિટ સુધી થંભી ગઈ હતી, જેના કારણે પાછળ આવતા ટ્રકો અને અન્ય વાહનો ફસાઈ ગયા હતા.
સદનસીબે, તંત્ર અને વન વિભાગે પરિસ્થિતિને ગંભીર બનતી જોઈને તત્કાળ કાર્યવાહી કરી. ઘટનાની જાણ થતાં જ ચિડિયાઘરના સુપરિન્ટેન્ડેન્ટ અને અનુભવી ડોકટરોની એક વિશેષ ટીમ તાત્કાલિક ઘટનાસ્થળે પહોંચી ગઈ હતી. આ ટીમે જરા પણ સમય ગુમાવ્યા વિના, હાથીને શાંત પાડવા માટે ઇન્જેક્શન આપ્યું. ડોકટરોની કુશળતા અને ત્વરિત કામગીરીના પરિણામે, ગજરાજને સફળતાપૂર્વક કાબૂમાં લઈ શકાયો. હાથીને શાંત પડ્યા બાદ તેને રથયાત્રાના માર્ગથી થોડે દૂર સુરક્ષિત રીતે બાંધી દેવામાં આવ્યો હતો.
આ નાસભાગ દરમિયાન એક યુવકને સામાન્ય ઈજા થઈ હોવાનું જાણવા મળ્યું છે. ઘાયલ યુવકને તાત્કાલિક ૧૦૮ એમ્બ્યુલન્સ દ્વારા નજીકની હોસ્પિટલમાં સારવાર અર્થે ખસેડવામાં આવ્યો હતો. પ્રશાસનની સરાહનીય અને સમયસરની કામગીરીને કારણે કોઈ મોટી દુર્ઘટના ટળી હતી અને પરિસ્થિતિ સામાન્ય બનતા જ રથયાત્રા ફરીથી તેના નિર્ધારિત માર્ગે આગળ વધી શકી હતી. આ ઘટનાએ રથયાત્રામાં હાથીઓને શામેલ કરવાની સુરક્ષા વ્યવસ્થા પર ફરીથી વિચારણા કરવાનો મુદ્દો ઉભો કર્યો છે.
(11:42 AM IST)









છેલ્લા 8 દિવસમાં સૌથી લોકપ્રિય 
