જમ્મુ-કાશ્મીર તા.૩૦ : ભારતીય સેનાએ  જમ્મુ અને કાશ્મીરના રાજૌરીમાં નિયંત્રણ રેખા (LoC) પર આતંકવાદીઓ દ્વારા ઘૂસણખોરીના પ્રયાસને નિષ્ફળ બનાવ્યો છે. સેનાએ જણાવ્યું હતું કે આ દરમિયાન એક પાકિસ્તાની ગાઇડની ધરપકડ કરવામાં આવી છે. સેનાએ જણાવ્યું હતું કે, 'સતર્ક સૈનિકો દ્વારા ઝડપી અને નિર્ણાયક કાર્યવાહી બાદ એક મુખ્ય ગાઇડની ધરપકડ કરવામાં આવી હતી, જેનાથી ઘૂસણખોરીના પ્રયાસને અસરકારક રીતે નિષ્ફળ બનાવવામાં આવ્યો હતો અને ઘૂસણખોર આતંકવાદીઓને ઇજાઓ પણ પહોંચી હતી.'

સેનાએ બાતમીના આધારે કરી કાર્યવાહી

એક સંરક્ષણ અધિકારીએ જણાવ્યું હતું કે, 'બાતમી મળી હતી કે નિયંત્રણ રેખા પાર આતંકવાદીઓને મોકલવાનો પ્રયાસ કરવામાં આવી રહ્યો છે, ત્યારબાદ સેનાએ BSF સાથે મળીને એક ઓપરેશન હાથ ધર્યું હતું. સૈનિકોએ ઘૂસણખોરીનો પ્રયાસ કરી રહેલા 4-5 ભારે સશસ્ત્ર આતંકવાદીઓની પ્રવૃત્તિ પર નજર રાખી હતી.'

ઓપરેશન દરમિયાન આતંકવાદીઓના ગાઇડની ધરપકડ

આ સંયુક્ત ઓપરેશન દરમિયાન એક વ્યક્તિની ધરપકડ કરવામાં આવી હતી. જેની ઓળખ ઘૂસણખોરીમાં મદદ કરનારા આતંકવાદીઓના માર્ગદર્શક તરીકે થઈ હતી. જો કે, આ ઓપરેશનમાં ભાગી જવાનો પ્રયાસ કરતી વખતે જૈશના ચાર આતંકવાદીઓ ઘાયલ થયા હતા.

સર્ચ ઓપરેશન દરમિયાન મોબાઇલ અને પાકિસ્તાની ચલણ મળી આવ્યું

ગાઇડની ધરપકડ કર્યા પછી સેનાએ વિસ્તારમાં સર્ચ ઓપરેશન હાથ ધર્યું હતું. આ દરમિયાન મોબાઇલ ફોન અને પાકિસ્તાની ચલણ સહિત ઘણી સંવેદનશીલ વસ્તુઓ મળી આવી હતી. અધિકારીએ જણાવ્યું કે શરૂઆતની પૂછપરછ દરમિયાન ધરપકડ કરાયેલા વ્યક્તિએ જણાવ્યું હતું કે તે નિયંત્રણ રેખા નજીક પીઓકેનો રહેવાસી છે અને આગળની ચોકીઓ પર તૈનાત પાકિસ્તાની સૈન્ય અધિકારીઓના નિર્દેશો પર કામ કરી રહ્યો હતો.

આતંકવાદીઓ મોટી માત્રામાં હથિયારો સાથે ઘૂસણખોરી કરવા માંગતા હતા

અધિકારીના જણાવ્યા મુજબ ધરપકડ કરાયેલા ગાઇડે પુષ્ટિ આપી હતી કે જૈશ એ મોહમ્મદના આતંકવાદીઓ મોટી માત્રામાં હથિયારો, દારૂગોળો અને યુદ્ધ સામગ્રી સહિત અન્ય વાંધાજનક સામગ્રી લઈ જઈ રહ્યા છે, જે ઘુસણખોરોના નાપાક ઇરાદાઓની પુષ્ટિ કરે છે.