પાડોશી દેશ પાકિસ્તાનમાં લઘુમતી સમુદાયો પર થતા અત્યાચારોના અહેવાલોથી સમયાંતરે હૃદય કંપી ઉઠે છે. પરંતુ હવે આ ક્રૂર વાસ્તવિકતા વૈશ્વિક મંચ પર, ખાસ કરીને યુનાઇટેડ કિંગડમ (UK)ની સંસદમાં ખુલ્લી પડી છે! એક વિશેષ સત્રમાં પાકિસ્તાનમાં હિંદુઓ, ખ્રિસ્તીઓ, શિયાઓ અને અહમદીઓ સામે થતા ધાર્મિક અત્યાચારોને 'વ્યવસ્થિત અને રાજ્ય-પ્રાયોજિત' ગણાવવામાં આવ્યા છે.
 
સગીર બાળકીઓનું અપહરણ, ધર્માંતરણ અને... ભયાવહ આંકડા!
સત્રમાં જે સૌથી ગંભીર સમસ્યા પર પ્રકાશ પાડવામાં આવ્યો તે છે, સિંધ પ્રાંતમાં હિંદુ અને ખ્રિસ્તી સમુદાયોની સગીર છોકરીઓનું અપહરણ અને જબરજસ્તી ધર્માંતરણ. આ આંકડાઓ એટલા ભયાવહ છે કે કલ્પના કરવી પણ મુશ્કેલ છે:
•    દર વર્ષે 500 થી 1,000 બાળકીઓનું અપહરણ કરવામાં આવે છે.
•    આ બાળકીઓને ઘણીવાર રાજકીય રીતે પ્રભાવશાળી મૌલવીઓ દ્વારા સંચાલિત ધાર્મિક સ્થળો દ્વારા માનવ તસ્કરી કરવામાં આવે છે.

આ ઉપરાંત, હિંદુ મંદિરો અને ધર્મશાળાઓ પર થતા હુમલાઓ પણ તેમની સાંસ્કૃતિક અને ધાર્મિક વિરાસતને ભૂંસી નાખવાના પ્રયાસનો એક ભાગ છે. 2023માં કાશ્મીરમાં એક મંદિર પર થયેલો રોકેટ હુમલો તેનું જ્વલંત ઉદાહરણ છે.
 
શિયા અને અહમદી સમુદાયો પર પણ સિતમ!
લઘુમતીઓ પરના અત્યાચારો માત્ર હિંદુઓ અને ખ્રિસ્તીઓ પૂરતા મર્યાદિત નથી. શિયા અને અહમદી સમુદાયો સામે પણ જબરજસ્તી ગુમ કરવા, સાંપ્રદાયિક હિંસા અને ધાર્મિક અધિકારોથી વંચિત કરવાના કિસ્સાઓ સામે આવ્યા છે.
 
પાકિસ્તાનને જવાબદાર ઠેરવવાની માંગ!
આ સત્રમાં સિંધ ફ્રીડમ મૂવમેન્ટના અધ્યક્ષ સોહેલ અબ્રો અને અન્ય સમુદાયોના પ્રતિનિધિઓએ અવાજ ઉઠાવ્યો. બ્રિટિશ સાંસદો ફ્લેર એન્ડરસન અને ડેવિડ સ્મિથે વિગતવાર આંકડા અને પ્રત્યક્ષદર્શીઓના નિવેદનો રજૂ કર્યા.

સત્રના અંતે, આંતરરાષ્ટ્રીય સમુદાય સમક્ષ સ્પષ્ટ માંગ કરવામાં આવી છે:
•    આ અત્યાચારોની સ્વતંત્ર તપાસ થવી જોઈએ.
•    જબરજસ્તી ધર્માંતરણ અને ધાર્મિક સંસ્થાઓ પરના હુમલાઓ સામે કડક કાર્યવાહી થવી જોઈએ.
•    આ માટે જવાબદાર વ્યક્તિઓ પર પ્રતિબંધો લાદવાની પણ ચર્ચા થઈ.