નવી દિલ્‍હી, તા.૭: હવે ભારત કે દુનિયાની પ્રતિષ્ઠિત સંસ્‍થામાંથી અભ્‍યાસ કર્યા પછી પણ નોકરી મળવાની કોઈ ગેરંટી નથી. ઓક્‍સફર્ડ યુનિવર્સિટીમાંથી તાાતક થયેલા એક વ્‍યક્‍તિ સાથે પણ આવો જ કિસ્‍સો બન્‍યો છે. નોકરી ન મળતાં હવે ડિંગ યુઆનઝાઓ નામનો એક માણસ સિંગાપોરમાં ફૂડ ડિલિવરી બોય તરીકે કામ કરી રહ્યો છે.

હિન્‍દુસ્‍તાન ટાઈમ્‍સે ૧૬૩.com ના એક અહેવાલને ટાંકીને જણાવ્‍યું હતું કે ૩૯ વર્ષીય ડીંગ યુઆનઝાઓએ ગયા વર્ષે પોતાની નોકરી ગુમાવી દીધી હતી. આ પછી તેણે સિંગાપોરમાં ફૂડ ડિલિવરીનું કામ શરૂ કર્યું. ડિંગ યુઆનઝાઓએ વિશ્વની ટોચની યુનિવર્સિટીઓમાંથી ઘણી ડિગ્રીઓ મેળવી છે. તેમણે યુકેની ઓક્‍સફર્ડ યુનિવર્સિટીમાંથી જૈવવિવિધતામાં માસ્‍ટર ડિગ્રી મેળવી છે. આ ઉપરાંત, તેમણે પેકિંગ યુનિવર્સિટીમાંથી એનર્જી એન્‍જિનિયરિંગમાં માસ્‍ટર ડિગ્રી અને સિંગાપોરની નાન્‍યાંગ ટેકનોલોજીકલ યુનિવર્સિટીમાંથી બાયોલોજીમાં ડોક્‍ટરેટની ડિગ્રી પણ મેળવી છે.

આટલી બધી ડિગ્રીઓ હોવા છતાં, ડિંગ સારી નોકરી મેળવી શકતો નથી. SCMP ના અહેવાલ મુજબ, ડિંગે નેશનલ યુનિવર્સિટી ઓફ સિંગાપોરમાં પોસ્‍ટડોક્‍ટરલ સંશોધન કર્યું હતું. પરંતુ તેમનો કરાર માર્ચમાં સમાપ્ત થયો. આ પછી, તેણે ફૂડ ડિલિવરીનું કામ શરૂ કર્યું.

ઓક્‍સફર્ડ યુનિવર્સિટીના આ તાાતકે ઘણી કંપનીઓને પોતાનો સીવી મોકલ્‍યો અને ૧૦ ઇન્‍ટરવ્‍યુ પણ આપ્‍યા. છતાં, તેને નોકરી ન મળી. આખરે, તેણે સિંગાપોરમાં ફૂડ ડિલિવરી વર્કર તરીકે નોંધણી કરાવી.

દિવસમાં ૧૦ કલાક કામ કરીને, ડિંગ દર અઠવાડિયે ૭૦૦ સિંગાપોર ડોલર (લગભગ ૪૭ હજાર રૂપિયા) કમાય છે. એટલે કે દર મહિને લગભગ બે લાખ રૂપિયા. ડીંગ સોશિયલ મીડિયા પર કહે છે કે આ ખરાબ વાત નથી. તે એક સ્‍થિર નોકરી છે, તેમણે કહ્યું. આ કમાણીથી હું મારા પરિવારનું ગુજરાન ચલાવી શકું છું. જો તમે સખત મહેનત કરો છો, તો તમે સારી કમાણી કરી શકો છો. આ ખરાબ વાત નથી. તેમણે વધુમાં કહ્યું કે ખોરાક પહોંચાડવાનો એક ફાયદો એ છે કે તમને કસરત પણ મળે છે.