રાજકોટ: આજે વહેલી સવારે ઈઝરાયેલ વાયુસેનાના લગભગ ૨૦ ફાઈટર જેટ્સે યમનના પશ્ચિમ ભાગમાં આવેલા ઈરાન-સમર્થિત હુતી આતંકવાદી જૂથના માળખાકીય સ્થળો પર ૫૦થી વધુ ચોકસાઈ-માર્ગદર્શિત બોમ્બ વડે વ્યાપક હુમલા કર્યા હતા. આ હુમલાઓમાં અલ-હુદાયદાહ, રાસ ઈસા, સલિફના બંદરો અને રાસ કનાતિબ પાવર પ્લાન્ટને નિશાન બનાવવામાં આવ્યા હતા.

આ હવાઈ હુમલાઓ રેડ સી (લાલ સમુદ્ર) માં એક કોમર્શિયલ શિપિંગ વેસલ પર થયેલા હુમલા અને હુતીઓ દ્વારા ઈઝરાયેલ વિરુદ્ધ સતત કરવામાં આવી રહેલા બેલેસ્ટિક મિસાઈલ અને ડ્રોન હુમલાઓના જવાબમાં કરવામાં આવ્યા છે.

ઈઝરાયેલ વાયુસેના દ્વારા જાહેર કરાયેલા ફૂટેજમાં ૧૧૯મી સ્ક્વોડ્રનના એફ–૧૬૧ "સુફા" મલ્ટિરોલ ફાઈટર જેટ્સ દક્ષિણ ઈઝરાયેલના રામોન એરબેઝ પરથી યમનમાં હુતીઓ વિરુદ્ધના હુમલાઓ માટે ઉડાન ભરતા જોવા મળ્યા હતા.

આ હુમલાઓને "ઓપરેશન આયર્ન ફિસ્ટ" નામ આપવામાં આવ્યું છે. ઈઝરાયેલે જણાવ્યું છે કે આ હુમલાઓ હુતીઓની દરિયાઈ હુમલા કરવાની ક્ષમતાને ગંભીર રીતે નબળી પાડવા માટે રચાયા હતા. ગુપ્તચર માહિતી અનુસાર, હુતીઓ આ બંદરોનો ઉપયોગ શિપિંગ લેન પર હુમલાઓ કરવા અને શસ્ત્રોની હેરાફેરી માટે કરતા હતા. રાસ કનાતિબ પાવર પ્લાન્ટને નિશાન બનાવવાનું કારણ એ હતું કે તે હુતીઓના ડ્રોન અને મિસાઈલ પ્રક્ષેપણ સુવિધાઓને વીજળી પૂરી પાડતો હતો.

હુતી જૂથે આ હુમલાઓની પુષ્ટિ કરી છે અને તેને "અમેરિકા-બ્રિટિશ-ઝિઓનિસ્ટ આક્રમણ" ગણાવ્યું છે. તેઓએ વળતો પ્રહાર કરવાની ધમકી પણ ઉચ્ચારી છે. આ ઘટનાક્રમથી મધ્ય પૂર્વમાં તણાવ વધુ વકરવાની શક્યતા છે. આંતરરાષ્ટ્રીય સમુદાયે આ પરિસ્થિતિ પર ચિંતા વ્યક્ત કરી છે અને સંયમ જાળવવા અપીલ કરી છે.