વડોદરાના ગંભીરા બ્રિજ દુર્ઘટનામાં એક હૃદયદ્રાવક દ્રશ્ય સામે આવ્યું છે, જ્યાં એક માતા પોતાના જીવની પરવા કર્યા વગર પાણીમાં ડૂબેલા પુત્ર માટે આક્રંદ કરી રહી છે. આ 40 વર્ષ જૂનો પુલ ધરાશાયી થતાં અનેક વાહનો નદીમાં ખાબક્યા હતા, જેમાં અત્યાર સુધીમાં 9 લોકોના મોત થયા છે.

આ ઘટનાનો એક વિડિયો સામે આવ્યો છે, જેમાં સ્પષ્ટપણે જોઈ શકાય છે કે પાણીમાં ડૂબી રહેલી એક માતા પોતાના પુત્રને બચાવવા માટે કેવો આક્રંદ કરી રહી છે. આ વિડિયોમાં નદીમાં પડેલા વાહનોના હોર્ન વાગી રહ્યા છે અને તેની સાથે ભળતો માતાનો આર્તનાદ કોઈ પણ કઠણ કાળજાને કંપીત કરી દે તેવો છે.

આ દુર્ઘટનામાં દરિયાપુર ગામના એક પરિવારનો માળો વિખેરાઈ ગયો છે. આ કરુણાંતિકામાં માતા સોનલબેન પઢિયાર ઘાયલ થયા છે, પરંતુ તેમના પતિ રમેશભાઈ પઢિયાર, પુત્રી વૈદિકા અને પુત્ર નૈતિકનું નિધન થયું છે. આ પરિવાર બગદાણા ખાતે પૂનમ ભરવા જઈ રહ્યો હતો ત્યારે આ દુર્ઘટના બની.

દુઃખની વાત એ છે કે, પુત્રની માનતા પૂરી કરવા માટે પરિવારના ચારેય સભ્યો ઇકો કારમાં બગદાણા જઈ રહ્યા હતા. સોનલબેન ડિક્કી પાસે બેઠા હતા અને આ દુર્ઘટનામાં તેઓ બચી ગયા, પરંતુ તેમના પતિ અને બંને બાળકો કાળનો કોળિયો બની ગયા.

નદીમાં ખાબકેલી ઇકો કારને લોકોએ રસ્સાથી મદદથી બહાર ખેંચી હતી. જેમાંથી 6 મૃતદેહ મળી આવ્યા છે. આ દરમિયાન સ્થાનિક યુવકે જણાવ્યું કે, અમે લોકો સવારથી રેસ્ક્યૂની કામગીરી કરી રહ્યા છીએ. અત્યાર સુધીમાં 9 મૃતદેહ બહાર કાઢવામાં આવ્યા છે. તેમજ ઇજાગ્રસ્તોને નજીકની હોસ્પિટલમાં સારવાર અર્થે ખસેડવામાં આવી રહ્યા છે.