હવે એતિહાદ એરવેઝ કલકતા - અબુધાબી ફલાઇટમાં આપશે હાઇસ્પીડ Wi-Fi સર્વિસ
ટુંક સમયમાં ફલાઇટમાં થશે ખાસ સર્વિસ : હવે ફલાઇટમાં પણ ઓટીટી એપ, મનપસંદ મુવી અને શો જોઇ શકાશે
નવી દિલ્હી, તા.૧૦: હવાઈ મુસાફરો માટે એક સારા સમાચાર છે. ટૂંક સમયમાં તમને ફ્લાઇટમાં એવી ખાસ સેવા મળવા જઈ રહી છે, જેને તમે ઇચ્છો તો પણ ના પાડી શકશો નહીં. હા, હવે તમે આકાશમાં ઉડતી વખતે પણ હાઇ-સ્પીડ ઇન્ટરનેટનો આનંદ માણી શકશો. હાલમાં એતિહાદ એરવેઝ તેના કોલકાતા-અબુ ધાબી રૂટ પર આ ખાસ સેવા શરૂ કરી રહી છે. આ ખાસ સેવા બધા હવાઈ મુસાફરો માટે હશે, પછી ભલે તેઓ ઇકોનોમી ક્લાસ, બિઝનેસ ક્લાસ અથવા ફર્સ્ટ ક્લાસમાં મુસાફરી કરી રહ્યા હોય.
એતિહાદ એરવેઝના જણાવ્યા અનુસાર, તે ૨૬ સપ્ટેમ્બરથી કોલકાતા-અબુ ધાબી રૂટ પર નવા અને આધુનિક એરક્રાફ્ટ A321LRનો ઉપયોગ કરશે. આ એરક્રાફ્ટ જૂના A320 ને બદલશે. આ નવા વિમાનમાં ફર્સ્ટ-ક્લાસ સ્યુટ્સ, બિઝનેસ ક્લાસમાં સંપૂર્ણપણે ફ્લેટ ફોલ્ડ કરીને બેડમાં ફેરવાતી લાઈ-ફ્લેટ સીટો અને ઇકોનોમી ક્લાસમાં 4K ટચસ્ક્રીન જેવી શ્રેષ્ઠ સુવિધાઓ હશે. સૌથી મહત્વની વાત એ છે કે આ વિમાનમાં ઉપલબ્ધ હાઇ-સ્પીડ વાઇ-ફાઇની ખાસ સેવા તમારી મુસાફરીને મનોરંજક બનાવશે.
એતિહાદ એરવેઝના ચીફ રેવન્યુ અને કોમર્શિયલ ઓફિસર એરિક ડેએ જણાવ્યું હતું કે આ વાઇ-ફાઇથી તમે ફક્ત તમારા લેપટોપ પર જ કામ કરી શકશો નહીં, પરંતુ જિયો હોટ સ્ટાર, નેટફિ્લક્સ, એમેઝોન પ્રાઇમ જેવા OTT પ્લેટફોર્મ પર તમારી મનપસંદ ફિલ્મો અને શો પણ જોઈ શકશો. એટલું જ નહીં, બધા મુસાફરો વોટ્સએપ, ઇન્સ્ટાગ્રામ, મેસેન્જર અને વીચેટ પર મફતમાં ચેટ કરી શકશે. ફર્સ્ટ-ક્લાસ મુસાફરોને મફતમાં વેબ કોલ અને ઓનલાઈન સામગ્રી જોવાની સુવિધા મળશે, પરંતુ અન્ય મુસાફરોએ આ માટે થોડો ખર્ચ કરવો પડશે.
જો કે, અહીં એક નાની સમસ્યા છે. ભારત સરકારની સેટેલાઇટ નીતિને કારણે, ભારતીય હવાઈ ક્ષેત્રમાં ઇન્ટરનેટ સેવા પૂરી પાડવા અંગે મૂંઝવણ છે. એતિહાદને આશા છે કે આ મુદ્દો ટૂંક સમયમાં ઉકેલાઈ જશે. સૂત્રોના જણાવ્યા અનુસાર, જો આ સમસ્યાનું નિરાકરણ નહીં આવે, તો કોલકાતાથી અબુ ધાબી જતા મુસાફરોને પહેલા ૧:૩૦ કલાક સુધી આ સુવિધા મળશે નહીં. ભારતીય હવાઈ ક્ષેત્ર પાર કરતાની સાથે જ ઇન્ટરનેટ સેવા શરૂ થઈ જશે. તમને જણાવી દઈએ કે કોલકાતા અને અબુ ધાબી વચ્ચેની મુસાફરી લગભગ ૪.૧૫ કલાકની છે.(૨૩.૨૬)
(4:00 PM IST)
છેલ્લા 8 દિવસમાં સૌથી લોકપ્રિય 
