ગુરુગ્રામ : ગુરુગ્રામના સેક્ટર 57 માંથી એક ચોંકાવનારી અને હૃદયદ્રાવક ઘટના સામે આવી છે, જ્યાં એક સ્ટેટ લેવલની ટેનિસ ખેલાડી રાધિકા યાદવની તેના જ પિતાએ ગોળી મારીને હત્યા કરી દીધી છે. પોલીસ સૂત્રોના જણાવ્યા અનુસાર, પિતા રાધિકાના સોશિયલ મીડિયા પર રીલ્સ બનાવવાથી નારાજ હતા, અને આ ગુસ્સામાં તેમણે પોતાની જ દીકરીનો જીવ લઈ લીધો. ઘટનાની જાણ થતા જ પોલીસ ઘટનાસ્થળે પહોંચી હતી, મૃતદેહનો કબજો લઈ પોસ્ટમોર્ટમ માટે મોકલી આપ્યો હતો અને મામલાની તપાસ શરૂ કરી હતી.
 
પારિવારિક વિવાદ અને 3 ગોળીઓ
પોલીસના જણાવ્યા અનુસાર, આ ઘટના ગુરુવારે બપોરે લગભગ 12 વાગ્યે સેક્ટર 57 ના એક મકાનમાં બની, જ્યાં રાધિકા પોતાના પરિવાર સાથે રહેતી હતી. પરિવારમાં તે સમયે પારિવારિક વિવાદ થયો, જેના પછી પિતાએ ગુસ્સામાં આવીને રાધિકા પર એક પછી એક ત્રણ ગોળીઓ ચલાવી દીધી.

ગોળીઓ વાગ્યા બાદ 25 વર્ષીય રાધિકાને ગંભીર હાલતમાં એક ખાનગી હોસ્પિટલમાં લઈ જવામાં આવી હતી, પરંતુ ડોકટરો તેને બચાવી શક્યા નહીં. રાધિકા યાદવ સ્ટેટ લેવલની જાણીતી ટેનિસ ખેલાડી હતી અને તેણે અનેક સ્પર્ધાઓમાં મેડલ જીતીને પરિવાર અને વિસ્તારનું નામ રોશન કર્યું હતું.
 
આરોપી પિતાની ધરપકડ અને રિવોલ્વર જપ્ત
ઘટનાની જાણ થતા જ ગુરુગ્રામ પોલીસ ઘટનાસ્થળે પહોંચી અને આરોપી પિતાની તાત્કાલિક ધરપકડ કરી લીધી. પોલીસે હત્યામાં ઉપયોગમાં લેવાયેલ રિવોલ્વર પણ જપ્ત કરી લીધી છે. હાલ પોલીસ આ મામલાની ઊંડાણપૂર્વક તપાસ કરી રહી છે અને હત્યા પાછળના સંપૂર્ણ કારણો જાણવાનો પ્રયાસ કરી રહી છે. પ્રાથમિક તપાસમાં રીલ્સ બનાવવા જેવી બાબતો સામે આવી છે, પરંતુ અન્ય કોઈ કારણો છે કે કેમ તેની પણ તપાસ ચાલુ છે. આ ઘટનાએ પરિવાર અને સમગ્ર વિસ્તારમાં શોક અને સદમો ફેલાવી દીધો છે.