ઓડિશામાંથી એક હૃદયદ્રાવક અને અમાનવીય ઘટના સામે આવી છે, જેણે આખા દેશને હચમચાવી દીધો છે! પ્રેમ લગ્ન કરનાર એક યુગલને ગામલોકોએ તાલિબાની સજા આપી છે, જેમાં તેમના ગળામાં હળ બાંધીને તેમને ખેતરમાં બળદની જેમ ખેડવા મજબૂર કરવામાં આવ્યા. આ ઘટનાનો વીડિયો સોશિયલ મીડિયા પર વાયરલ થતાં ભારે આક્રોશ ફેલાયો છે.
 
યુવક-યુવતી અત્યંત લાચાર સ્થિતિમાં છે અને તેમને બળદની જેમ ખેતરમાં હળ ખેંચવા દબાણ કરવામાં આવી રહ્યું છે, જ્યારે આસપાસ ઉભેલા લોકો આ દ્રશ્ય જોઈ રહ્યા છે - કેટલાક મૂક પ્રેક્ષક બનીને તો કેટલાક વીડિયો રેકોર્ડ કરતા. આ ઘટના સામાજિક ક્રૂરતાની પરાકાષ્ઠા દર્શાવે છે.સોશિયલ મીડિયા પર વાયરલ થઈ રહેલા વીડિયોમાં સ્પષ્ટપણે જોઈ શકાય છે કે, કેટલાક લોકો એક યુવાન પ્રેમી યુગલના ગળામાં હળની દોરી બાંધીને તેમને ખેતર ખેડવા માટે મજબૂર કરી રહ્યા છે. 
 
રક્ષાબંધનના સંબંધને પ્રેમ સંબંધમાં બદલવાની સજા:
આ આખી ઘટના ઓડિશાના રાયગડા જિલ્લાના કંજમઝીરા ગામની છે. અહીંના એક યુવક અને યુવતીએ પ્રેમ લગ્ન કર્યા. આ સંબંધ ગામની જૂની પરંપરાઓ અને રીતિ-રિવાજો વિરુદ્ધ હતો, કારણ કે યુવક, યુવતીના સગા ફોઈનો દીકરો હતો. સ્થાનિક પરંપરાઓ અનુસાર, આવા સંબંધને 'વર્જિત' માનવામાં આવે છે. આ પરંપરા તોડવી ગામના કેટલાક લોકોને એટલી નાગવાર લાગી કે તેમણે પ્રેમને અપરાધ માનીને આ યુગલને અમાનવીય સજા આપવાનું નક્કી કર્યું.

ગામની પંચાયત કે ભીડે આ યુગલને ક્રૂરતાપૂર્વક દંડિત કર્યા. તેમના ગળામાં દોરડા વડે હળ બાંધી દેવામાં આવ્યું, અને તેમને ખેતર ખેડવા માટે મજબૂર કરવામાં આવ્યા, જાણે કે તેઓ કોઈ પ્રાણી હોય! આ દ્રશ્ય માત્ર ક્રૂર જ નહીં, પરંતુ તે માનસિકતાને પણ ઉજાગર કરે છે, જે આજે પણ પ્રેમ અને સ્વતંત્ર નિર્ણયને ગુનો માને છે.
 
વાયરલ વીડિયો અને દેશભરમાં આક્રોશ:
વાયરલ થઈ રહેલા વીડિયોમાં એ પણ સ્પષ્ટ દેખાય છે કે ખેતર ખેડતી વખતે કેટલાક લોકો તેમને ડંડા વડે બેરહેમીથી મારપીટ કરી રહ્યા છે. આ દ્રશ્ય કોઈની પણ આત્માને હચમચાવી દે તેવું છે. આ ઘટનાનો વીડિયો સોશિયલ મીડિયા પર ઝડપથી ફેલાઈ ગયો, અને દેશભરમાં લોકોએ તેની સખત નિંદા કરી. આ ક્રૂરતાને જોઈને સવાલ ઉભા થયા છે કે, શું આજે પણ પ્રેમને પરંપરાની અદાલતમાં ઘસડવામાં આવશે? શું કોઈ વ્યક્તિના સ્વૈચ્છિક લગ્ન, કોઈ સમાજની સામૂહિક સજાનું કારણ બની શકે છે?

લોકો આ વીડિયોને લઈને ખુબ જ આક્રોશિત છે અને ગુનેગારો સામે કડક કાર્યવાહીની માંગ કરી રહ્યા છે. ઘણા યુઝર્સ તેને માનવાધિકારોનું ઘોર ઉલ્લંઘન ગણાવીને સંબંધિત પ્રશાસનને દખલ દેવાની અપીલ કરી રહ્યા છે. આ ઘટનાની ગંભીરતાને જોતા આ મામલો હાલ ચર્ચામાં છે.