કોલકાતા : દેશની પ્રતિષ્ઠિત ઇન્ડિયન ઇન્સ્ટિટ્યૂટ ઑફ મેનેજમેન્ટ (IIM) કલકત્તાના વિદ્યાર્થી પર એક મહિલાએ બળાત્કારનો ગંભીર આરોપ લગાવ્યો છે. આ ચોંકાવનારી ઘટના IIM કોલેજના હોસ્ટેલમાં બની હોવાનું સામે આવ્યું છે. પીડિતાએ હરિદેવપુર પોલીસ સ્ટેશનમાં ફરિયાદ નોંધાવ્યા બાદ, આરોપી વિદ્યાર્થી મહાવીર ટોપન્નાવર ઉર્ફે પરમાનંદ જૈનની પોલીસ દ્વારા ધરપકડ કરવામાં આવી છે.

શું છે સમગ્ર મામલો?
કોલકાતા પોલીસે જણાવ્યું કે ગઈકાલે એક યુવતીએ હરિદેવપુર પોલીસ સ્ટેશનમાં ફરિયાદ નોંધાવી હતી કે IIM કોલેજની હોસ્ટેલમાં એક વિદ્યાર્થીએ તેની સાથે બળાત્કાર કર્યો છે. ફરિયાદ નોંધાતા જ પોલીસે તુરંત કાર્યવાહી કરી અને આરોપી મહાવીર ટોપન્નાવર ઉર્ફે પરમાનંદ જૈનને કસ્ટડીમાં લઈને પૂછપરછ બાદ તેની ધરપકડ કરી. આરોપી MBA નો બીજા વર્ષનો વિદ્યાર્થી છે.

આરોપીને આજે કોલકાતા કોર્ટમાં રજૂ કરવામાં આવ્યો હતો, જ્યાંથી તેને 7 દિવસની પોલીસ કસ્ટડીમાં મોકલી દેવામાં આવ્યો છે. આ કેસની આગામી સુનાવણી 19 જુલાઈએ થશે.

માતાનો ભાવુક દાવો: "મારો દીકરો નિર્દોષ છે!"
બળાત્કારના આરોપમાં ઝડપાયેલા મહાવીર ટોપન્નાવર ઉર્ફે પરમાનંદ જૈનની માતાએ પોતાના દીકરાને નિર્દોષ ગણાવ્યો છે. તેમણે કહ્યું, "અમને રાત્રે લગભગ 11 વાગ્યે તેના મિત્રનો ફોન આવ્યો હતો. તેણે જણાવ્યું કે મારા દીકરાને કસ્ટડીમાં લેવામાં આવ્યો છે અને તેને તેનું કારણ ખબર નથી. અમને ખબર નથી કે અમારા દીકરાને શા માટે પકડવામાં આવ્યો છે. અમે અમારા દીકરાને મળવા અને તેની સાથે વાત કરવા માંગીએ છીએ."

માતાએ વધુમાં જણાવ્યું, "તે પોતાના કોલેજના અંતિમ વર્ષમાં હતો. અમને અહીં કોલકાતામાં કશું જ ખબર નથી કે પોલીસ સ્ટેશન કે કોર્ટ ક્યાં છે. મારો દીકરો નિર્દોષ છે. તે આટલે દૂર ભણવા આવ્યો છે. તે ક્યારેય આવું ગંદુ કામ નહીં કરે."

કોંગ્રેસે કાયદો અને વ્યવસ્થા પર સવાલ ઉઠાવ્યા:
આ ઘટનાને લઈને કોંગ્રેસના સાંસદ અધીર રંજન ચૌધરીએ પશ્ચિમ બંગાળમાં કાયદો અને વ્યવસ્થાની સ્થિતિ પર ગંભીર સવાલો ઉઠાવ્યા છે. તેમણે કહ્યું કે, "બંગાળમાં કાયદો અને વ્યવસ્થા દિવસેને દિવસે નબળી પડી રહી છે. મહિલાઓ વિરુદ્ધ અપરાધો વધી રહ્યા છે અને અપરાધીઓમાં કાયદાનો કોઈ ડર નથી. સરકારની બેદરકારીને કારણે મહિલાઓ આવા અપરાધોનો શિકાર બની રહી છે. સરકારે આવા અપરાધીઓને દંડિત કરવા માટે કડક પગલાં ભરવા પડશે. બંગાળના અપરાધીઓ કાયદાથી ડરતા નથી, તેઓ સતત અપરાધ કરી રહ્યા છે."

આ ઘટનાએ શૈક્ષણિક સંસ્થાઓની સુરક્ષા અને વિદ્યાર્થીઓના વર્તન પર ગંભીર પ્રશ્નો ઉભા કર્યા છે. પોલીસ આ મામલે ઊંડાણપૂર્વક તપાસ કરી રહી છે.