મુંબઈ, તા. ૧૫ જુલાઈ, ૨૦૨૫ (મંગળવાર): ભારતીય ઓટોમોબાઈલ ઉદ્યોગ માટે એક નવો અધ્યાય આજે શરૂ થયો છે! વિશ્વની અગ્રણી ઇલેક્ટ્રિક કાર નિર્માતા કંપની ટેસ્લાએ આખરે ભારતીય બજારમાં સત્તાવાર રીતે પ્રવેશ કર્યો છે. લાંબા સમયની પ્રતીક્ષાનો અંત લાવતા, કંપનીએ આજે મુંબઈના પ્રતિષ્ઠિત બાંદ્રા કુર્લા કોમ્પ્લેક્સ (BKC) માં તેના પહેલા ભવ્ય શોરૂમનું ઉદ્ઘાટન કર્યું. આ સાથે જ, ટેસ્લાની લોકપ્રિય ઇલેક્ટ્રિક કાર ટેસ્લા મોડેલ Y ને કંપનીની સત્તાવાર વેબસાઇટ પર પણ સૂચિબદ્ધ કરવામાં આવી છે, જે ભારતીય ગ્રાહકો માટે ઇલેક્ટ્રિક મોબિલિટીના નવા યુગનો સંકેત આપે છે. મહારાષ્ટ્રના મુખ્યમંત્રી દેવેન્દ્ર ફડણવીસે આ શુભ પ્રસંગે ટેસ્લાના પ્રથમ શોરૂમનું ઉદ્ઘાટન કર્યું.
મુખ્યમંત્રીનું ઉત્પાદન માટે આમંત્રણ:
આ પ્રસંગે, મુખ્યમંત્રી દેવેન્દ્ર ફડણવીસે ટેસ્લાને ભારતમાં ફક્ત કાર વેચવા નહીં, પરંતુ તેનું ઉત્પાદન પણ શરૂ કરવા માટે આમંત્રણ આપ્યું હતું. ફડણવીસે જણાવ્યું કે, "ઇલેક્ટ્રિક કારના ઉત્પાદન અને ચાર્જિંગ ઇન્ફ્રાસ્ટ્રક્ચર બનાવવા માટે અમારી નીતિ સારી છે. આ ઉપરાંત, અમે ઉત્પાદનને પ્રોત્સાહન આપી રહ્યા છીએ. આ એક સારી શરૂઆત છે, અમે ભારતમાં સંશોધન અને વિકાસ (R&D) તેમજ ઉત્પાદન જોવા માંગીએ છીએ." તેમણે આશા વ્યક્ત કરી કે ટેસ્લા યોગ્ય સમયે આ દિશામાં વિચારશે.
ટેસ્લા મોડેલ Y: કિંમત અને વેરીઅન્ટ્સ:
કંપનીએ ભારતીય બજાર માટે ટેસ્લા મોડેલ Y ની શરૂઆતની એક્સ-શોરૂમ કિંમત ૫૯.૮૯ લાખ રૂપિયા (મુંબઈ) નક્કી કરી છે. આ કાર રિયલ વ્હીલ ડ્રાઇવ (RWD) અને લોંગ રેન્જ વેરિઅન્ટ સાથે બજારમાં લોન્ચ કરવામાં આવશે.
કંપનીની સત્તાવાર વેબસાઇટ અનુસાર, મુંબઈ, દિલ્હી અને ગુરુગ્રામ માટે મોડેલ Y નું બુકિંગ શરૂ થઈ ગયું છે. મુંબઈમાં તેના એન્ટ્રી લેવલ મોડેલ રીઅર વ્હીલ ડ્રાઇવ વેરિઅન્ટની ઓન-રોડ કિંમત ૬૧,૦૭,૧૯૦ રૂપિયા હશે, જેમાં ૨,૯૨,૮૧૮ રૂપિયાનો GST શામેલ છે. જ્યારે તેના લોંગ રેન્જ વેરિઅન્ટની ઓન-રોડ કિંમત ૬૯,૧૫,૧૯૦ રૂપિયા હશે, જેમાં ૩,૩૦,૯૧૩ રૂપિયાનો GST શામેલ છે. ગ્રાહકોએ ફુલ-સેલ્ફ ડ્રાઇવિંગ (FSD) વેરિઅન્ટ માટે અલગથી ૬ લાખ રૂપિયા ચૂકવવા પડશે.
ફીચર્સ અને ડ્રાઇવિંગ રેન્જ:
ટેસ્લા મોડેલ Y નું રીઅર વ્હીલ ડ્રાઇવ વેરિઅન્ટ ભારતીય બજારમાં બે અલગ-અલગ બેટરી પેક (૬૦ kWh અને મોટું ૭૫ kWh બેટરી પેક) સાથે ઓફર કરવામાં આવી રહ્યું છે. તેના RWD વેરિઅન્ટમાં સિંગલ ઇલેક્ટ્રિક મોટર છે, જે લગભગ ૨૯૫ hp પાવર જનરેટ કરે છે. ૬૦ kWh બેટરી એક જ ચાર્જ પર ૫૦૦ કિમીની ડ્રાઇવિંગ રેન્જ (WLTP પ્રમાણિત) આપે છે, જ્યારે લોંગ રેન્જ વેરિઅન્ટ ૬૨૨ કિમીની પ્રભાવશાળી ડ્રાઇવિંગ રેન્જ આપે છે.
ટેસ્લા મોડેલ Y ભારતમાં કુલ ૭ અલગ-અલગ બાહ્ય રંગ વિકલ્પો અને ૨ આંતરિક ટ્રીમ સાથે ઉપલબ્ધ થશે. આ કારમાં ૧૫.૪-ઇંચ ઇન્ફોટેનમેન્ટ ડિસ્પ્લે (ફ્રન્ટ), ૮-ઇંચ રીઅર સ્ક્રીન, પાવર-એડજસ્ટેબલ ફ્રન્ટ સીટ્સ અને સ્ટીયરિંગ કોલમ, ડ્યુઅલ-ઝોન ઓટોમેટિક ક્લાઇમેટ કંટ્રોલ, ૧૯-ઇંચ ક્રોસફ્લો વ્હીલ્સ, ફિક્સ્ડ ગ્લાસ રૂફ અને પાવર રીઅર લિફ્ટગેટ જેવી આધુનિક સુવિધાઓનો સમાવેશ થાય છે.
સ્પીડ અને ચાર્જિંગ:
કંપનીનો દાવો છે કે રીઅર વ્હીલ ડ્રાઇવ વર્ઝન ૫.૯ સેકન્ડમાં ૦ થી ૧૦૦ કિમી/કલાકની ગતિ પકડી શકે છે, જ્યારે લાંબા અંતરના વર્ઝનને આ જ અંતર કાપવામાં ૫.૬ સેકન્ડ લાગે છે. આ કારની બેટરી સુપરચાર્જરથી માત્ર ૧૫ મિનિટમાં ચાર્જ થશે અને લગભગ ૨૩૮ કિમીથી ૨૬૭ કિમીની ડ્રાઇવિંગ રેન્જ આપશે, જે લાંબા રૂટ માટે ખૂબ જ અનુકૂળ છે.
અન્ય દેશો કરતાં ભારતમાં મોંઘી:
નોંધનીય છે કે, ટેસ્લા મોડેલ Y ની શરૂઆતની કિંમત યુ.એસ.માં $૪૪,૯૯૦ (લગભગ રૂ. ૩૮.૬૩ લાખ), ચીનમાં ૨૬૩,૫૦૦ યુઆન (લગભગ રૂ. ૩૧.૫૭ લાખ) અને જર્મનીમાં ૪૫,૯૭૦ યુરો (લગભગ રૂ. ૪૬.૦૯ લાખ) છે. તેની સરખામણીમાં, ભારતીય બજારમાં તેની શરૂઆતની કિંમત લગભગ ૬૦ લાખ રૂપિયા છે. આ દર્શાવે છે કે ટેસ્લાની કાર અન્ય દેશો કરતાં ભારતમાં ઘણી મોંઘી છે, જે ઊંચા આયાત શુલ્ક અને કરવેરાને કારણે હોઈ શકે છે. તેમ છતાં, ભારતીય ગ્રાહકોમાં ઇલેક્ટ્રિક કાર પ્રત્યેની વધતી જાગૃતિ અને ટેસ્લાની બ્રાન્ડ વેલ્યુને કારણે તેનું વેચાણ સારું રહેવાની અપેક્ષા છે.