પટના 18 જુલાઈ 2025: રાષ્ટ્રીય જનતા દળ (RJD) માંથી હાંકી કઢાયેલા તેજ પ્રતાપ યાદવ નવા રાજકીય પક્ષ કે સંગઠનની જાહેરાત કરી શકે છે. તેઓ આજે સાંજે 5 વાગ્યે એક પ્રેસ કોન્ફરન્સને સંબોધિત કરવાના હતા, પરંતુ હજુ સુધી તેમની કોઈ પ્રેસ કોન્ફરન્સ થઈ નથી. આ સંબંધમાં કોઈ માહિતી પણ આપવામાં આવી નથી. જોકે, એવી અટકળો છે કે તેઓ પ્રેસ કોન્ફરન્સમાં નવી રાજકીય પાર્ટીની જાહેરાત કરી શકે છે.
 
તેજ પ્રતાપને RJDમાંથી શા માટે કાઢી મૂકાયા?
તેજ પ્રતાપ યાદવને મે 2025માં રાષ્ટ્રીય જનતા દળમાંથી 6 વર્ષ માટે હાંકી કાઢવામાં આવ્યા હતા. તેનું કારણ એક ફેસબુક પોસ્ટ હતી, જેમાં તેમણે અનુષ્કા યાદવ સાથેના પોતાના 12 વર્ષ જૂના પ્રેમ સંબંધનો ખુલાસો કર્યો હતો. તેઓ પરિણીત હોવા છતાં આ પોસ્ટ એક મોટો વિવાદ બની ગઈ હતી. તેમની પત્ની ઐશ્વર્યા રાય સાથેનો તેમનો છૂટાછેડાનો કેસ પહેલાથી જ ચાલી રહ્યો હતો.

RJD સુપ્રીમો લાલુ પ્રસાદે આ મામલે કડક વલણ અપનાવ્યું હતું. તેમણે એક સાર્વજનિક નિવેદનમાં કહ્યું કે તેજ પ્રતાપની ગતિવિધિઓ અને તેમનું આ આચરણ બિનજવાબદાર છે અને પારિવારિક મૂલ્યો તથા સંસ્કારોને અનુરૂપ નથી. તેથી તેમને પાર્ટી અને પરિવારથી દૂર રાખવાનો નિર્ણય લેવામાં આવ્યો છે. લાલુ પ્રસાદના નાના પુત્ર અને પૂર્વ નાયબ મુખ્યમંત્રી તેજસ્વી યાદવ સહિત પરિવારના અન્ય સભ્યોએ પણ આ નિર્ણયને સમર્થન આપ્યું હતું.
 
RJD માટે વધશે ટેન્શન?
પાર્ટી અને પરિવારમાંથી હાંકી કઢાયા બાદ તેજ પ્રતાપ છેલ્લા કેટલાક દિવસોથી પોતાના માટે નવી ભૂમિકા શોધી રહ્યા હતા. તેજ પ્રતાપ યાદવનું આ પગલું ખુદ RJD માટે તણાવનું કારણ બની શકે છે, કારણ કે હવે વિધાનસભા ચૂંટણીમાં વધારે સમય બાકી નથી. આવી સ્થિતિમાં, જો તેજ પ્રતાપ યાદવ નવી પાર્ટીની જાહેરાત કરે છે, તો તે RJD માટે અસ્વસ્થતાભરી સ્થિતિ ઊભી કરી શકે છે.

ફૂટનો ફાયદો BJP-JDU ને:
જો તેજ પ્રતાપ યાદવ નવી પાર્ટી બનાવે છે, તો ભાજપ અને જનતા દળ યુનાઈટેડ (JDU) તેમને હથિયાર બનાવવાની તક ચૂકશે નહીં. આવા સંજોગોમાં RJD માટે નવી મુશ્કેલીઓ ઊભી થશે. ભાજપ અને JDU તરફથી એ પૂરો પ્રયાસ થશે કે તેઓ લાલુ પરિવારમાં પડેલી ફૂટનો ભરપૂર ફાયદો ઉઠાવે.