નવી દિલ્હી :યુનાઈટેડ કિંગડમની મુલાકાત દરમિયાન વડાપ્રધાન મોદી બ્રિટિશ વડાપ્રધાન કીર સ્ટાર્મરને મળ્યા હતા. સોશિયલ મીડિયા પર બંનેનો એક રસપ્રદ વિડિયો વાયરલ થઈ રહ્યો છે, જેમાં તેઓ એક ભારતીયના ટી સ્ટોલ પરથી ચા પીતા જોવા મળી રહ્યા છે. ચા પીરસનાર વ્યક્તિનું નસીબ રાતોરાત બદલાઈ ગયું અને હવે તે સ્ટાર ચા વેચનાર બની ગયો છે. ચાના સ્ટોલ પર પીએમ મોદી અને કીર સ્ટાર્મર વચ્ચે 'ચાય પર ચર્ચા' થઈ.

જ્યારે પીએમ મોદી બ્રિટન ગયા હતા, ત્યારે બ્રિટિશ વડાપ્રધાનના સત્તાવાર નિવાસસ્થાન ચેકર્સ ખાતે એક ચાનો સ્ટોલ બનાવવામાં આવ્યો હતો. અહીં પહોંચેલા પીએમ મોદી અને કીર સ્ટાર્મરે ચા પીધી અને બંનેએ હળવી વાતચીત પણ કરી. ચા વેચનાર અખિલ પટેલે તેમના સ્ટોલ પર બંનેનું સ્વાગત કર્યું અને આ દરમિયાન પીએમ મોદીએ કહ્યું, "ચાય પર ચર્ચા."

અખિલ પટેલે કહ્યું કે- અમે તમને ભારતીય ચા પીરસવા જઈ રહ્યા છીએ, જેના પાંદડા આસામના છે અને મસાલા કેરળના છે. આના પર પીએમ મોદીએ કીર સ્ટાર્મરને કહ્યું કે આ ભારતનો સ્વાદ છે. અખિલ પટેલે પહેલા કીર સ્ટાર્મરને ચા આપી અને પછી પીએમ મોદીને ચા આપતા પહેલા કહ્યું- એક ચા વેચનાર બીજા ચા વેચનારને ચા પીરસી રહ્યો છે. આ સાંભળીને ત્યાં હાજર લોકો જોરથી હસી પડ્યા.

આ વિડિયો સોશિયલ મીડિયા પર વાયરલ થયો છે અને મિહિર પંડ્યાએ પોતાના ઇન્સ્ટાગ્રામ પર શેર કર્યો છે. આ વિડિયોને માત્ર 18 કલાકમાં 15 મિલિયન (1.5 કરોડથી વધુ) લોકોએ જોયો છે. જ્યારે પીએમ મોદી અને કીર સ્ટાર્મરે આ સ્ટોલ પર ચા પીધી હતી, ત્યારે મિહિર પંડ્યા પણ ચર્ચામાં આવ્યા હતા. જ્યારે તેમના વિડિયોને હજારો વ્યૂઝ મળતા હતા, તો બીજી તરફ ફક્ત એક જ વિડિયોને 1.5 કરોડથી વધુ લોકોએ જોયો છે.

અખિલ પટેલ બ્રિટનમાં એક ઉદ્યોગસાહસિક છે. તેમણે હેમ્પસ્ટેડ યુનિવર્સિટી કોલેજ સ્કૂલ, લંડનમાં અભ્યાસ કર્યો અને પછી લંડન સ્કૂલ ઓફ ઇકોનોમિક્સ એન્ડ પોલિટિકલ સાયન્સ (LSE)માંથી BScની ડિગ્રી મેળવી છે. અભ્યાસ પૂર્ણ કરીને જ્યારે અખિલ દેશ પાછો ફર્યો, ત્યારે તે 2018માં લદ્દાખ ગયો. અહીં તેના મનમાં ઉદ્ભવેલા એક વિચારે તેને લંડનમાં 'ચાવાળો' બનાવી દીધો. 2019માં અખિલે તેની દાદી દ્વારા બનાવેલી ચાથી પ્રેરિત થઈને 'આમલા ચા'ની સ્થાપના કરી. તેણે હોમ-સ્ટાઇલ ટીના સૂત્ર સાથે તેની બ્રાન્ડનો પ્રચાર કર્યો અને હવે લંડનમા 6 સ્થળોએ તેના સ્ટોલ છે.