નવી દિલ્‍હી તા.૨૬: આપણે વર્ષોથી સાંભળતા આવ્‍યા છીએ કે દેશનાં અમીર વ્‍યક્‍તિ વધુ અમીર બની રહ્યા છે અને ગરીબ વ્‍યક્‍તિ વધુ ગરીબ. વાસ્‍તવમાં હવે આ મામલે બર્નસ્‍ટીનનો રીપોર્ટ સામે આવ્‍યો છે. જેમાં દેશના ધનિકો વધુ ધનવાન બની રહ્યા હોવાનું સામે આવ્‍યું છે. ટોચના એક ટકા સુપર-રિચ પરિવારો પાસે કુલ સંપત્તિ લગભગ  ડોલર૧૧.૬ ટ્રિલિયન છે. આમાંથી લગભગ  ડોલર ૨.૭ ટ્રિલિયન પ્રવાહી નાણાકીય સંપત્તિમાં છે. તેમની વધતી જતી નાણાકીય સંપત્તિ સંપત્તિ વ્‍યવસ્‍થાપન કંપનીઓ માટે વિશાળ તકો ઊભી કરી રહી છે.

આ રિપોર્ટ મુજબ ભારતના સૌથી ધનિક પરિવારો વધુ ધનવાન બનવા જઈ રહ્યા છે. આનાથી સંપત્તિ વ્‍યવસ્‍થાપકોની સંખ્‍યામાં જબરદસ્‍ત વધારો થઈ રહ્યો છે. રીપોર્ટનું માનીએ તો આ ધનિકોની તરલ સંપત્તિમાં બેંક ડિપોઝિટ અને નોન-પ્રમોટર્સના ઇક્‍વિટી શેરનો સમાવેશ થાય છે. ભારતીય પરિવારો ધીમે ધીમે તેમની વધતી જતી બચત અને સંપત્તિનો વધુ ભાગ નાણાકીય સંપત્તિમાં ટ્રાન્‍સફર કરી રહ્યા છે.

ભારતમાં મૂડી બજારોમાં તેજી પણ આ વલણમાં ફાળો આપી રહી છે. વાસ્‍તવમાં અતિ-ધનિક લોકો આઇપીઓ અને બ્‍લોક ડીલ દ્વારા પ્રમોટર હોલ્‍ડિંગ્‍સને પ્રવાહી નાણાકીય સંપત્તિમાં રૂપાંતરિત કરી રહ્યા છે. આ લોકો મૂડી બજારમાં તેજીનો લાભ લઈ રહ્યા છે. ઉપરાંત સ્‍ટાર્ટઅપ ઇકોસિસ્‍ટમમાંથી શ્રીમંત વ્‍યક્‍તિઓનો એક નવો વર્ગ ઉભરી રહ્યો છે. આમાં સ્‍થાપકો અને શરૂઆતના કર્મચારીઓનો સમાવેશ થાય છે. આને કારણે ઉચ્‍ચ-નેટ-વર્થ વ્‍યક્‍તિઓની સંખ્‍યા વધુ ઝડપથી વધી રહી છે.

અતિ-ધનિકોનો આ વધતો જતો સમૂહ હવે તેમના વધતા નાણાકીય પોર્ટફોલિયોનું સંચાલન કરવા માટે વ્‍યાવસાયિક સલાહકારોની ભરતી કરી રહ્યો છે. જોકે સલાહકાર બજારમાં હજુ પણ અસંગઠિત ખેલાડીઓ અને પરંપરાગત બેંકોનું વર્ચસ્‍વ છે.