જમ્મુ, તા. 28 : પહેલગામમાં નિર્દોષ પ્રવાસીઓના લોહીથી હાથ રંગનારા આતંકવાદીઓ આખરે ઓપરેશન 'મહાદેવ'માં સેનાના શિકાર બન્યા છે. 26 પ્રવાસીઓના જીવ લેનારા લશ્કર-એ-તૈયબાના ખતરનાક કમાન્ડર હાશિમ મુસા સહિતના આતંકવાદીઓને ભારતીય સેનાએ ઠાર માર્યા છે. પરંતુ, આટલા દિવસો સુધી સુરક્ષા દળોને ચકમો આપનારા આ આતંકવાદીઓનો અંત કેવી રીતે આવ્યો? આ સવાલનો જવાબ છે એક અણધારી ટેકનોલોજી – ચીની અલ્ટ્રા રેડિયો કોમ્યુનિકેશન સિસ્ટમ!
પહેલગામ હુમલા બાદ સમગ્ર કાશ્મીરમાં હાઈ એલર્ટ હતું. ડ્રોન, થર્મલ ઇમેજિંગ અને માનવ ગુપ્તચર નેટવર્ક દ્વારા આતંકવાદીઓની દરેક હિલચાલ પર બાજનજર રાખવામાં આવી રહી હતી. 96 દિવસ સુધી આતંકવાદીઓ ગાઢ જંગલો અને પહાડોમાં છુપાઈ રહેવામાં સફળ રહ્યા, પરંતુ તેમની એક ભૂલ તેમને ભારે પડી.
સુરક્ષા એજન્સીઓના સૂત્રો અનુસાર, સતત મોનિટરિંગ દરમિયાન એક ચોંકાવનારો સંકેત મળ્યો: ગાઢ જંગલમાં એક ચાઇનીઝ અલ્ટ્રા રેડિયો કોમ્યુનિકેશન સિસ્ટમ સક્રિય હતી! લશ્કર-એ-તૈયબાના આતંકવાદીઓ આ સિસ્ટમ દ્વારા એન્ક્રિપ્ટેડ સંદેશાઓની આપ-લે કરી રહ્યા હતા. આ સંકેત મળતા જ સેના સમજી ગઈ કે આતંકવાદીઓ ક્યાં છુપાયેલા છે. બસ, પછી તો 'ઓપરેશન મહાદેવ' શરૂ થઈ ગયું.
ચીની અલ્ટ્રા રેડિયો કોમ્યુનિકેશન: આતંકીઓની સંચાર ચેનલ અને સેનાનું હથિયાર
આ ચીની અલ્ટ્રા રેડિયો કોમ્યુનિકેશન સિસ્ટમ એક હાઈ-ટેક રેડિયો કોમ્યુનિકેશન ટેકનોલોજી છે જે હાઈ-ફ્રિકવન્સી અને અલ્ટ્રા-હાઈ ફ્રીક્વન્સી (UHF) બેન્ડનો ઉપયોગ કરે છે. 2016 થી 'WY SMS' તરીકે ઓળખાતી આ સિસ્ટમ આતંકવાદી સંગઠનો માટે એક સુરક્ષિત સંચાર ચેનલ તરીકે કુખ્યાત છે. તેની સૌથી મોટી ખાસિયત એ છે કે તે દુર્ગમ પર્વતીય વિસ્તારોમાં પણ કામ કરે છે અને તેના સિગ્નલને જામ કરવું અત્યંત મુશ્કેલ છે, જેના કારણે તે આતંકવાદીઓની પસંદ બની ગઈ હતી.
જ્યારે સુરક્ષા એજન્સીઓને આ 'ગોલ્ડન સિગ્નલ' મળ્યું, ત્યારે તરત જ મહાદેવ પર્વત પર આતંકવાદીઓના ઠેકાણાઓ પર ડ્રોન અને ગુપ્તચર માહિતીના આધારે નજર રાખવામાં આવી. 28 જુલાઈની વહેલી સવારે, સુરક્ષા દળોએ સમગ્ર વિસ્તારને ઘેરી લીધો. છ કલાક સુધી ચાલેલા ભીષણ એન્કાઉન્ટર દરમિયાન, પહેલગામ હુમલામાં વપરાયેલા AK-47, ગ્રેનેડ અને IED સહિતના હથિયારોનો મોટો જથ્થો પણ મળી આવ્યો હતો. સૂત્રોએ ભારપૂર્વક જણાવ્યું કે, આતંકવાદીઓને શોધવામાં અને તેમને પકડવામાં આ અલ્ટ્રા રેડિયો સિગ્નલોએ જ મુખ્ય ભૂમિકા ભજવી હતી.
આ ઓપરેશન દર્શાવે છે કે ટેકનોલોજીનો ઉપયોગ ગુનેગારોને મદદ કરી શકે છે, પરંતુ તે જ ટેકનોલોજી તેમની પકડનું કારણ પણ બની શકે છે. ભારતીય સુરક્ષા દળોની ચાણક્ય નીતિ અને આધુનિક ટેકનોલોજીનો ઉપયોગ કરવાની ક્ષમતાએ 'ઓપરેશન મહાદેવ'ને સફળ બનાવ્યું અને પહેલગામના શહીદોને ન્યાય અપાવ્યો.