પૂણે,તા.૧૨: પૂણે જિલ્‍લાના ખેડ તાલુકામાં કુંડેશ્વર શિવ મંદિરના દર્શન માટે શ્રદ્ધાળુઓને લઇ જઈ રહેલું પિકઅપ વાહન ૨૫-૩૦ ફૂટ ઊંડી ખીણમાં ખાબક્‍યું હતું. આ દુર્ઘટનામાં ઓછામાં આછી આઠ મહિલા શ્રદ્ધાળુના મોત થયા છે. તમામ પીડિતો પાપલવાડીના રહેવાસી હતા અને દર્શન માટે જઈ રહ્યા હતા. ખીણ વિસ્‍તારમાં વાહન પલટીને ખીણમાં ખાબક્‍યું હતું. દસ મહિલાઓના ઘટનાસ્‍થળે જ મોત થયા, ઘાયલ થયેલા ૨૯ શ્રદ્ધાળુઓને આરોગ્‍ય કેન્‍દ્રમાં સારવાર માટે લઈ જવામાં આવ્‍યા છે. ઘાયલોમાંથી કેટલાકની હાલત ગંભીર છે. પિપરી-ચિચવડ પોલીસના ડીસીપી શિવાજી પવારે કહ્યું કે, પીકઅપ વાહનમાં અંદાજે ૪૦ જેટલા શ્રદ્ધાળુઓ હતા, જે શ્રાવણ મહિનાના સોમવારે ભગવાન શિવજીના દર્શન કરવા જઈ રહ્યા હતા.  વડાપ્રધાન નરેન્‍દ્ર મોદીએ દુર્ઘટના પર ઊંડા દુખની લાગણી વ્‍યક્‍ત કરી અને શોકગ્રસ્‍ત પરિવારો પ્રત્‍યે પોતાની સંવેદના વ્‍યક્‍ત કરી, તેમજ ઘાયલો જલદી સ્‍વસ્‍થ થાય એ માટે પ્રાર્થના કરી છે.