નવી દિલ્હી:લોકસભા ચૂંટણીમાં ભાજપે કેરળમાં જીતેલી એકમાત્ર બેઠક ત્રિશૂર હવે 'મત ચોરી'ના આરોપોને કારણે વિવાદમાં ઘેરાઈ ગઈ છે. કૉંગ્રેસ અને CPI(M) બંને પક્ષોએ ત્રિશૂરની મતદાર યાદીમાં ગંભીર ગેરરીતિઓ હોવાનો દાવો કર્યો છે. ભાજપના ઉમેદવાર સુરેશ ગોપી આ બેઠક પર 70,000 થી વધુ મતોના માર્જિનથી જીત્યા હતા. 
 કૉંગ્રેસના સાંસદ કે.સી. વેણુગોપાલે જણાવ્યું કે ત્રિશૂરમાંથી પણ મતદાર યાદીમાં ગડબડીના અનેક કિસ્સાઓ સામે આવી રહ્યા છે.
કૉંગ્રેસ નેતા વી.ડી. સતીસને આરોપ લગાવ્યો કે, "એક જ નામવાળા ઘણા મતદારો હતા, એક જ રૂમવાળા ઘરમાં 60 મતદારો નોંધાયેલા હતા, અને 18 વર્ષના નવા મતદારોની ઉંમર ખરેખર 70-80 વર્ષની હતી."
ઈન્ડિયા ટુડેના અહેવાલ મુજબ, ત્રિશૂરની એક મહિલાએ દાવો કર્યો છે કે તેના સરનામે નવ 'નકલી' મતદારો નોંધાયેલા છે, જેમાંથી તે કોઈને ઓળખતી નથી. તેણે જિલ્લા કલેક્ટરને આ અંગે ફરિયાદ કરી છે.
 આ વિવાદ વચ્ચે, રાહુલ ગાંધીએ દાવો કર્યો છે કે સમગ્ર દેશમાં ભાજપે ચૂંટણી પંચની મદદથી 'મત ચોરી' કરી છે. તેમણે કહ્યું કે, નરેન્દ્ર મોદી માત્ર 25 બેઠકોના માર્જિનથી વડાપ્રધાન બન્યા છે. તેમણે ચૂંટણી પંચ પર પુરાવાઓનો નાશ કરવાનો પણ આરોપ લગાવ્યો છે, જેને ચૂંટણી પંચે ફગાવી દીધો છે.
આ ઘટના ચૂંટણી પંચની કામગીરી અને લોકશાહીની પારદર્શિતા પર ગંભીર સવાલો ઊભા કરી રહી છે. વિપક્ષી દળો આ મુદ્દાને રાષ્ટ્રીય સ્તરે ઉઠાવી રહ્યા છે અને ચૂંટણી પંચ પાસે સ્પષ્ટતાની માગ કરી રહ્યા છે