નવી દિલ્હી : ભારતના 79મા સ્વતંત્રતા દિવસની ઉજવણી માત્ર દેશમાં જ નહીં, પરંતુ વિદેશમાં પણ ભારતીય નૌકાદળ દ્વારા કરવામાં આવી છે. ભારતીય નૌકાદળના અત્યાધુનિક યુદ્ધ જહાજ INS તમાલએ ઇટાલીના નેપલ્સ બંદર પર તિરંગો ફરકાવીને આઝાદીનો જશ્ન મનાવ્યો. આ યુદ્ધ જહાજ ગયા મહિને રશિયામાં કાર્યરત થયું હતું અને હવે ભારત તરફ પરત ફરી રહ્યું છે.
 
INS તમાલની આ ઇટાલી મુલાકાત ભારત અને ઇટાલી વચ્ચે વધતા સંરક્ષણ સહયોગનું પ્રતિબિંબ છે. 2023માં બંને દેશોના સંબંધોને 'વ્યૂહાત્મક ભાગીદારી'નું સ્તર મળ્યા બાદ સંરક્ષણ, ઊર્જા અને ટેકનોલોજીના ક્ષેત્રોમાં સહયોગ સતત વધી રહ્યો છે. આ મુલાકાત બંને નૌકાદળોને શ્રેષ્ઠ પદ્ધતિઓનું આદાનપ્રદાન કરવા અને ભવિષ્યમાં નવા સહયોગની તકો શોધવા માટે એક મંચ પૂરો પાડે છે.
 
નેપલ્સ બંદરે પહોંચતા પહેલા, INS તમાલે ઇટાલિયન નૌકાદળના જહાજ ITS ટ્રાયસ્ટે સાથે 'પાસેક્સ' કવાયતમાં ભાગ લીધો. આ સંયુક્ત કવાયતમાં સંદેશાવ્યવહાર અને હવાઈ કામગીરીનો સમાવેશ થાય છે. બંદર પર રોકાણ દરમિયાન, INS તમાલ પર વિવિધ કાર્યક્રમોનું આયોજન કરવામાં આવ્યું હતું, જેમાં નેપલ્સના નાગરિકો સાથે મુલાકાત અને ભારત-ઇટાલી સંબંધોને સન્માનિત કરતા સાંસ્કૃતિક કાર્યક્રમો પણ યોજાયા હતા.
 
1 જુલાઈના રોજ રશિયાના કાલિનિનગ્રાડ સ્થિત યંતાર શિપયાર્ડમાં ભારતીય નૌકાદળમાં સામેલ થયેલું INS તમાલ એક અત્યાધુનિક સ્ટીલ્થ ફ્રિગેટ છે. તે પરમાણુ, જૈવિક અને રાસાયણિક સંરક્ષણ પ્રણાલીઓથી સજ્જ છે. આ યુદ્ધ જહાજ બ્રહ્મોસ સુપરસોનિક ક્રુઝ મિસાઇલ અને વર્ટિકલ લોન્ચ સરફેસ-ટુ-એર મિસાઇલ જેવી ઘાતક શસ્ત્ર પ્રણાલીઓથી સજ્જ છે. આ યુદ્ધ જહાજ ભારતીય નૌકાદળની તાકાતમાં નોંધપાત્ર વધારો કરશે.