ન્યુયોર્ક: રશિયા-યુક્રેન યુદ્ધના અંત પછી સુરક્ષા ગેરંટી લાગુ કરવાના ભાગરૂપે યુક્રેનમાં અમેરિકન સૈનિકો મોકલવાની શક્યતાને પૂર્વ પ્રેસિડેન્ટ ડોનાલ્ડ ટ્રમ્પે નકારી નથી. તેમણે જણાવ્યું કે, આ અંગે વધુ વિગતો ટૂંક સમયમાં, કદાચ આજે યોજાનારી યુરોપિયન નેતાઓ અને યુક્રેનના પ્રેસિડેન્ટ ઝેલેન્સકી સાથેની બેઠક બાદ જાહેર થઈ શકે છે.

ટ્રમ્પના આ નિવેદનને ગંભીરતાથી જોવામાં આવી રહ્યું છે, કારણ કે તેઓ સતત યુક્રેન મુદ્દે અમેરિકન સૈન્યની સીધી દખલગીરીનો વિરોધ કરતા આવ્યા છે. જોકે, તેમણે હવે આ વિકલ્પને ખુલ્લો રાખ્યો છે, જે દર્શાવે છે કે પરિસ્થિતિમાં મોટો બદલાવ આવી શકે છે.

'મેં ભારત-પાકિસ્તાન સહિત છ યુદ્ધોનો અંત લાવ્યો, પણ આ સૌથી મુશ્કેલ': ટ્રમ્પ

 યુરોપિયન નેતાઓ અને યુક્રેનના પ્રેસિડેન્ટ ઝેલેન્સકી સાથેની બેઠક દરમિયાન પૂર્વ પ્રેસિડેન્ટ ડોનાલ્ડ ટ્રમ્પે ફરી એકવાર મોટું નિવેદન આપ્યું છે. ટ્રમ્પે કહ્યું કે તેમણે તાજેતરમાં ભારત અને પાકિસ્તાન વચ્ચેના સંઘર્ષ સહિત કુલ છ યુદ્ધોનો અંત લાવ્યો છે, પરંતુ રશિયા-યુક્રેનનું યુદ્ધ સૌથી વધુ મુશ્કેલ છે.

ટ્રમ્પના આ દાવાને કારણે રાજકીય વર્તુળોમાં ફરી ચર્ચાઓ શરૂ થઈ છે. તેમણે અગાઉ પણ આવા નિવેદનો કર્યા છે, પરંતુ આ વખતે યુરોપના મોટા નેતાઓ અને ઝેલેન્સકીની હાજરીમાં આ વાત કહેતા તેનું મહત્ત્વ વધી ગયું છે. ટ્રમ્પના આ નિવેદનથી રશિયા-યુક્રેન યુદ્ધના ઉકેલ માટેની તેમની રણનીતિ પર પણ સવાલો ઊભા થયા છે.