નવી દિલ્હી:ભારતના મુખ્ય ન્યાયાધીશ (CJI) બી.આર. ગવઈએ સોમવારે દિલ્હીમાં વરસાદ બાદ સર્જાતી અવ્યવસ્થા પર આકરી ટિપ્પણી કરી છે. કેરળ હાઈકોર્ટના આદેશ સામે નેશનલ હાઈવે ઓથોરિટી ઓફ ઈન્ડિયા (NHAI)ની અરજીની સુનાવણી દરમિયાન તેમણે કહ્યું કે, "તમને ખબર છે કે દિલ્હીમાં શું થાય છે? જો બે કલાક વરસાદ પડે તો આખું શહેર લકવાગ્રસ્ત થઈ જાય છે."

 ન્યાયાધીશ ગવઈએ ટ્રાફિક સમસ્યાને પણ ગંભીર ગણાવી. તેમણે કેરળના એક હાઈવે પર 12 કલાક સુધીના ટ્રાફિક જામ પર સવાલ ઉઠાવ્યો. સુપ્રીમ કોર્ટે NHAIને સ્પષ્ટપણે પૂછ્યું કે, "જો કોઈ વ્યક્તિને રસ્તાના એક છેડાથી બીજા છેડા સુધી પહોંચવામાં 12 કલાક લાગે, તો તેણે ટોલ શા માટે ચૂકવવો જોઈએ?"
કોર્ટે NHAIને ટોલ લેવા છતાં યોગ્ય સેવાઓ ન આપવા બદલ પણ ઠપકો આપ્યો. CJI એ કહ્યું કે, "તમે લોકો પાસેથી ટોલ લો છો, પરંતુ સેવાઓ આપતા નથી." અગાઉ પણ, સુપ્રીમ કોર્ટે રોડનું બાંધકામ પૂર્ણ ન થયું હોવા છતાં ટોલ વસૂલવા બદલ NHAIને ઠપકો આપ્યો હતો.
 સુનાવણી દરમિયાન NHAI વતી હાજર રહેલા સોલિસિટર જનરલ તુષાર મહેતાએ 12 કલાકના ટ્રાફિક જામ પાછળનું કારણ એક લારીનું પલટી જવું ગણાવ્યું. જોકે, આ દલીલથી કોર્ટ સંતુષ્ટ થઈ નહોતી. બેન્ચે કહ્યું કે, "લારી પોતાની મેળે પલટી નથી, તે ખાડાને કારણે પલટી ગઈ હતી."
સુપ્રીમ કોર્ટે NHAIની અરજી પર પોતાનો નિર્ણય અનામત રાખ્યો છે. આ કેસની સુનાવણી CJI બી.આર. ગવઈ, ન્યાયાધીશ કે. વિનોદ ચંદ્રન અને ન્યાયાધીશ એન.વી. અંજારિયાની બેન્ચે કરી હતી.