ઈસ્લામાબાદ: પાકિસ્તાનમાં મુશળધાર વરસાદ અને અચાનક આવેલા પૂરે ભારે તબાહી મચાવી છે. 15 ઓગસ્ટના રોજ શરૂ થયેલા વરસાદ બાદ દેશના ઉત્તર-પશ્ચિમ પ્રાંતો ખૈબર પખ્તુનખ્વા, ગિલગિટ-બાલ્ટિસ્તાન અને પાકિસ્તાન-ઓક્યુપાઈડ કાશ્મીર (POK) માં સ્થિતિ ગંભીર બની ગઈ છે. પાકિસ્તાનના વડા પ્રધાન શાહબાઝ શરીફના સંયોજક ઇખ્તિયાર વલી ખાને એક ચોંકાવનારો દાવો કર્યો છે કે આ આફતમાં મૃત્યુઆંક 1,000 થી વધુ સુધી પહોંચી શકે છે. 

પૂર અને ભૂસ્ખલનને કારણે સૌથી વધુ અસરગ્રસ્ત થયેલો પ્રાંત ખૈબર પખ્તુનખ્વા છે. અહીં એકલા બુનેર જિલ્લામાં 200 થી વધુ લોકોનાં મોત નીપજ્યાં છે. વાદળ ફાટવા જેવી ઘટનાઓને કારણે ઘણા ગામોમાં વિનાશ થયો છે, જ્યાં ઘરો નાશ પામ્યા, રસ્તાઓ તૂટી ગયા અને વાહનો પાણીમાં ધોવાઈ ગયા. 
પાકિસ્તાન સરકારના રાષ્ટ્રીય આપત્તિ વ્યવસ્થાપન સત્તામંડળ (NDMA) અનુસાર, અત્યાર સુધીમાં 337 લોકોના મોતની સત્તાવાર પુષ્ટિ થઈ છે, પરંતુ અસલી આંકડો આનાથી ઘણો મોટો હોઈ શકે છે. પૂરગ્રસ્ત વિસ્તારોમાં બચાવ કામગીરી હાથ ધરવામાં આવી રહી છે, પરંતુ ભારે વરસાદ અને પાણીના પ્રવાહને કારણે આ કામગીરીમાં મુશ્કેલીઓનો સામનો કરવો પડી રહ્યો છે. હજુ પણ ઘણા લોકો કાટમાળમાં ફસાયેલા હોવાનું માનવામાં આવે છે.
આ આફતને કારણે ખૈબર પખ્તુનખ્વા અને અન્ય પ્રભાવિત વિસ્તારોમાં હાઈ એલર્ટ જાહેર કરવામાં આવ્યું છે. લોકોને જોખમી વિસ્તારોથી દૂર રહેવાની સલાહ આપવામાં આવી છે અને ઘણા લોકોનું સુરક્ષિત સ્થળોએ સ્થળાંતર પણ કરવામાં આવ્યું છે. આ કુદરતી આફત પાકિસ્તાન માટે એક મોટો પડકાર બની રહી છે, જ્યાં જાનમાલનું ભારે નુકસાન થયું છે.