ગાઝા પટ્ટી, તા.૧૯: ગાઝામાં ૨૨ મહિનાથી ચાલી રહેલા ભીષણ યુદ્ધને સમાપ્ત કરવાની દિશામાં સફળતા મળી હોય તેવું લાગે છે. પેલેસ્‍ટિનિયન જૂથ હમાસે ગાઝામાં યુદ્ધવિરામ માટેનો નવો પ્રસ્‍તાવ સ્‍વીકાર્યો છે. આ પ્રસ્‍તાવ મધ્‍યસ્‍થી દેશો ઇજિપ્ત અને કતાર દ્વારા હમાસ સમક્ષ રજૂ કરવામાં આવ્‍યો હતો. આ અંગે હમાસે કહ્યું કે તે વાતચીત માટે તૈયાર છે. જોકે, ઇઝરાયલે હજુ સુધી આનો કોઈ જવાબ આપ્‍યો નથી. જો ઇઝરાયલ સકારાત્‍મક પ્રતિભાવ આપે છે, તો ગાઝામાં યુદ્ધ બંધ થઈ જશે.

હમાસના સૂત્રોએ એએફપીને જણાવ્‍યું કે હમાસે મધ્‍યસ્‍થીઓને કહ્યું છે કે તે અને સાથી જૂથો સુધારા વિના યુદ્ધવિરામ પ્રસ્‍તાવ પર સંમત છે. પેલેસ્‍ટિનિયન અધિકારીઓએ જણાવ્‍યું હતું કે નવા પ્રસ્‍તાવમાં ૬૦ દિવસનો યુદ્ધવિરામ શામેલ હશે. આ સમય દરમિયાન ઓછામાં ઓછા ૧૦ જીવંત ઇઝરાયલી બંધકોને મુક્‍ત કરવામાં આવશે અને કેટલાક મળતદેહો પરત કરવામાં આવશે. પેલેસ્‍ટિનિયન સૂત્રોએ જણાવ્‍યું હતું કે મધ્‍યસ્‍થી કરારની જાહેરાત કરે તેવી અપેક્ષા છે. આ પછી, વાટાઘાટો શરૂ કરવા માટે તારીખ નક્કી કરવામાં આવશે.

આ પ્રસ્‍તાવ એવા સમયે આવ્‍યો છે જ્‍યારે ઇઝરાયલીઓ યુદ્ધ બંધ કરવા માટે રસ્‍તાઓ પર ઉતરી રહ્યા છે. ગાઝામાં બંધકોની મુક્‍તિ માટે કરારની માંગ કરી રહેલા ઇઝરાયલી વિરોધીઓએ રવિવારે દેશ બંધ કરવાનો પ્રયાસ કર્યો. તે ૨૨ મહિના લાંબા યુદ્ધના સૌથી મોટા અને ઉગ્ર વિરોધ પ્રદર્શનોમાંનો એક હતો. બંધકોના પરિવારોનું પ્રતિનિધિત્‍વ કરતા આયોજકોએ દાવો કર્યો હતો કે લાખો લોકોએ તેમાં ભાગ લીધો હતો.

ગાઝાના કેટલાક સૌથી ગીચ વસ્‍તીવાળા વિસ્‍તારોમાં નવા લશ્‍કરી હુમલાની યોજના અંગે ઇઝરાયલના લોકોમાં હતાશા વધી રહી છે. ઘણા ઇઝરાયલીઓને ડર છે કે આ બાકીના બંધકોના જીવન માટે ખતરો ઉભો કરી શકે છે. એવું માનવામાં આવે છે કે બાકીના ૫૦ બંધકોમાંથી ૨૦ જીવંત છે. કેટલાક ભૂતપૂર્વ ઇઝરાયલી સૈન્‍ય અને ગુપ્તચર વડાઓ પણ લડાઈ સમાપ્ત કરવા માટે કરારની માંગ કરી રહ્યા છે.

ઓક્‍ટોબર ૨૦૨૩ થી ગાઝામાં ઇઝરાયલ દ્વારા કરવામાં આવેલા હુમલામાં ૬૨ હજારથી વધુ લોકોના મોત થયા છે. પેલેસ્‍ટિનિયન આરોગ્‍ય મંત્રાલયે જણાવ્‍યું હતું કે ઇઝરાયલ હમાસ યુદ્ધમાં મળત્‍યુઆંક ૬૨,૦૦૪ પર પહોંચી ગયો છે. તે જ સમયે, અત્‍યાર સુધીમાં ૧,૫૬,૨૩૦ લોકો ઘાયલ થયા છે. સહાય એજન્‍સીઓ અથવા નજીકના સહાય વિતરણ સ્‍થળો પાસેથી મદદ મેળવવાનો પ્રયાસ કરતી વખતે ૧,૯૬૫ લોકો મળત્‍યુ પામ્‍યા છે.