દિલ્હી, : અમેરિકન સેનેટર લિન્ડસે ગ્રેહામે એક સનસનાટીભર્યો દાવો કર્યો છે કે રશિયાના રાષ્ટ્રપતિ વ્લાદિમીર પુતિન અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચેની અલાસ્કા બેઠકનું મુખ્ય કારણ ભારતને ૫૦% ટેરિફ લાદવાની ધમકી હતી. આ દાવો ભારત અને રશિયાના અર્થતંત્રને 'મૃત' ગણાવ્યા બાદ અને ભારત પર ૫૦% ટેરિફ લાદીને ટ્રમ્પ દ્વારા થયેલી કડક કાર્યવાહીના થોડા દિવસો બાદ જ સામે આવ્યો છે.

સેનેટર ગ્રેહામે જણાવ્યું કે, "પુતિન અલાસ્કા માત્ર એટલા માટે આવ્યા કારણ કે ટ્રમ્પે ભારત પર ૫૦% ટેરિફ લાદવાની ધમકી આપી હતી. જો આપણે રશિયન તેલના ગ્રાહકોને કહીશું કે તેઓ અમેરિકાની અર્થવ્યવસ્થા અને સસ્તા રશિયન તેલમાંથી એકની પસંદગી કરે, તો તેઓ અમેરિકાની અર્થવ્યવસ્થા પસંદ કરશે."

ટ્રમ્પે ભારત પર ૨૫+૨૫ ટકા, એટલે કે કુલ ૫૦% ટેરિફ લાદ્યો છે. આ ઉપરાંત, તેમણે રશિયન તેલની ખરીદીને કારણે ભારત પર દંડ પણ લગાવ્યો હતો. ટ્રમ્પનું માનવું છે કે ભારતે રશિયન તેલ ખરીદીને યુક્રેન યુદ્ધમાં રશિયાને મદદ કરી છે.

આ પહેલી વાર નથી કે ગ્રેહામે ભારત અને ચીન જેવા દેશો વિરુદ્ધ કડક નિવેદન આપ્યું હોય. જુલાઈમાં તેમણે કહ્યું હતું કે, "જો તમે આ યુદ્ધ ચાલુ રાખવા માટે સસ્તું રશિયન તેલ ખરીદવાનું ચાલુ રાખશો, તો અમે તમારી હાલત ખરાબ કરીશું અને તમારી અર્થવ્યવસ્થાનો નાશ કરીશું, કારણ કે તમે જે કરી રહ્યા છો તે લોહીના પૈસા છે." તેમણે ઉમેર્યું કે "ટ્રમ્પ હવે આ રમતથી કંટાળી ગયા છે."

આ સમગ્ર ઘટનાક્રમ વચ્ચે, સોમવારે પુતિને પીએમ મોદીને ફોન કરીને અલાસ્કામાં ટ્રમ્પ સાથે થયેલી શિખર મંત્રણા વિશે માહિતી આપી. બંને નેતાઓ વચ્ચે છેલ્લા ૧૦ દિવસમાં આ બીજી ફોન વાતચીત હતી. મોદીએ પુતિનને યુક્રેન સંઘર્ષના શાંતિપૂર્ણ ઉકેલ પર ભારતના મક્કમ વલણથી અવગત કરાવ્યા અને કહ્યું કે ભારત તમામ શાંતિ પ્રયાસોને સમર્થન આપે છે.

ટ્રમ્પ અને પુતિન વચ્ચેની ત્રણ કલાકની શિખર મંત્રણા યુદ્ધવિરામ કરાર વિના જ સમાપ્ત થઈ ગઈ. મોદી અને પુતિન વચ્ચે આ વાતચીત ટ્રમ્પની વ્હાઇટ હાઉસમાં યુક્રેનના રાષ્ટ્રપતિ વોલોડીમીર ઝેલેન્સકી અને કેટલાક મુખ્ય યુરોપિયન નેતાઓ સાથેની મુલાકાત પહેલાં થઈ હતી. આના પરથી સ્પષ્ટ થાય છે કે રશિયા માટે ભારતીય બજાર અને ભારત સાથેના સંબંધો કેટલા મહત્વપૂર્ણ છે.