નવી દિલ્હી : અમેરિકાથી વિદેશમાં પૈસા મોકલવા હવે પહેલા કરતાં વધુ સરળ અને પારદર્શક બનશે. ગૂગલે આંતરરાષ્ટ્રીય રેમિટન્સ (મની ટ્રાન્સફર)ને વધુ સુવ્યવસ્થિત કરવા માટે વાઇઝ પ્લેટફોર્મ સાથે ભાગીદારી કરી છે. આ સહયોગ યુએસ ગ્રાહકોને સીધા જ ગૂગલ સર્ચમાં વિવિધ પ્રદાતાઓના ખર્ચની તુલના કરવાની સુવિધા આપશે.

આ નવી સુવિધાથી, જ્યારે પણ કોઈ ગ્રાહક ભારત, ફિલિપાઈન્સ, બ્રાઝિલ કે મેક્સિકો જેવા દેશોમાં ડોલર મોકલવા માટે ગૂગલ પર સર્ચ કરશે, ત્યારે તેમને તરત જ વાઇઝ, રિયા અને Xe જેવી કંપનીઓ દ્વારા લેવાતી ફી અને ટ્રાન્સફર માટે લાગતો સમય જોવા મળશે. સૌથી ખાસ વાત એ છે કે યુઝર્સ પ્લેટફોર્મ બદલ્યા વિના, ગૂગલ સર્ચ રિઝલ્ટ પેજ પર જ ટ્રાન્સફર પ્રક્રિયા પૂર્ણ કરી શકશે.

વાઇઝ પ્લેટફોર્મનું કહેવું છે કે આ ભાગીદારીનો મુખ્ય ઉદ્દેશ આંતરરાષ્ટ્રીય પેમેન્ટ્સમાં લાંબા સમયથી રહેલા છુપાયેલા ચાર્જ અને વિલંબની સમસ્યાઓને દૂર કરવાનો છે.

વાઇઝના APACના જનરલ મેનેજર સમર્થ બંસલે જણાવ્યું કે, "ક્રોસ-બોર્ડર પેમેન્ટ્સ હંમેશા ઊંચા ખર્ચ, અપારદર્શક ફી અને અણધારી સમયરેખા સાથે સંકળાયેલી રહી છે. વાઇઝ પ્લેટફોર્મ આ માળખાને બદલી રહ્યું છે, જેથી ઝડપી, વધુ પારદર્શક અને સસ્તું આંતરરાષ્ટ્રીય મની ટ્રાન્સફર શક્ય બને. આનાથી વિશ્વની કેટલીક સૌથી વિશ્વસનીય કંપનીઓને અજોડ ગ્રાહક અનુભવ પહોંચાડવા સક્ષમ બનાવશે."

આ ભાગીદારી ગ્રાહકો માટે વધુ પારદર્શિતા લાવશે, જે તેમને વાસ્તવિક ખર્ચ વિશે સ્પષ્ટતા આપશે અને નાણાકીય નિર્ણયો લેવામાં મદદ કરશે.