<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 20th August 2025

અફઘાનિસ્તાનમાં ત્રીપલ અકસ્માત: ૧૭ બાળકો સહિત ૫૦થી વધુનાં મોત

બસમાં અફઘાનિસ્તાનના શરણાર્થીઓ હતા: અકસ્માત પછી બસ સળગી ગઈ: માત્ર ત્રણ બચ્યા

કાબુલ: પશ્ચિમ અફઘાનિસ્તાનમાં એક ભયંકર માર્ગ અકસ્માતમાં ૫૦થી વધુ લોકોના મોત થયા છે, જેમાં ૧૭ બાળકોનો પણ સમાવેશ થાય છે. શરણાર્થીઓને લઈ જતી એક બસ, ટ્રક અને મોટરસાયકલ સાથે અથડાતાં તેમાં આગ લાગી ગઈ હતી. પ્રાંતીય સરકારી પ્રવક્તા અહમદુલ્લા મુત્તાકી અને સ્થાનિક પોલીસ દ્વારા આ માહિતી આપવામાં આવી છે.

 

અલ જઝીરાના એક અહેવાલ મુજબ, પોલીસે જણાવ્યું કે બસની વધુ પડતી ગતિ અને ડ્રાઇવરની બેદરકારીને કારણે આ અકસ્માત થયો હતો. પ્રાંતીય અધિકારી મોહમ્મદ યુસુફ સઈદીએ જણાવ્યું કે કાબુલ જઈ રહેલી આ બસમાં તાજેતરમાં ઈરાનથી દેશનિકાલ કરાયેલા અફઘાન શરણાર્થીઓ મુસાફરી કરી રહ્યા હતા. આ શરણાર્થીઓ ઈરાનથી દેશનિકાલ થયેલા અફઘાન લોકોના એક મોટા જૂથનો ભાગ હતા.

 

આ અકસ્માત ત્યારે થયો જ્યારે બસ પહેલા એક મોટરસાયકલ સાથે અને પછી બળતણ ભરેલા ટ્રક સાથે અથડાઈ. આ ટક્કર એટલી જોરદાર હતી કે તરત જ આગ ફાટી નીકળી. મૃતકોમાં ટ્રકમાં સવાર બે વ્યક્તિઓ અને મોટરસાયકલ પર સવાર બે વ્યક્તિઓનો પણ સમાવેશ થાય છે. આ અકસ્માતમાં બસના માત્ર ૩ મુસાફરો જ બચી શક્યા છે.

(10:01 AM IST)