નવી દિલ્હી: ભારત અને પાકિસ્તાન વચ્ચેના રમતગમતના સંબંધો પર ચાલી રહેલા સસ્પેન્સનો હવે અંત આવ્યો છે. ભારત સરકારના રમતગમત મંત્રાલયે એક સ્પષ્ટ નીતિ જાહેર કરી છે, જે મુજબ ભારત પાકિસ્તાન સાથે કોઈ પણ દ્વિપક્ષીય મેચો રમશે નહીં, પરંતુ બહુપક્ષીય ટુર્નામેન્ટમાં ભાગ લેવાનું ચાલુ રાખશે.
આ નીતિ એવા સમયે આવી છે જ્યારે તાજેતરમાં એશિયા કપ 2025માં ભારત-પાકિસ્તાન વચ્ચેની મેચ અને પાકિસ્તાનની હોકી ટીમે ભારતના એશિયા કપમાં ભાગ લેવાનો ઇનકાર કર્યા બાદ આ મુદ્દો ચર્ચામાં હતો.
જાણો નવી નીતિની મુખ્ય વાતો
 * દ્વિપક્ષીય સંબંધો પર પ્રતિબંધ: રમતગમત મંત્રાલયે સ્પષ્ટ કર્યું છે કે ભારત પાકિસ્તાનમાં યોજાનારી કોઈપણ દ્વિપક્ષીય સ્પર્ધામાં ભાગ લેશે નહીં. તે જ રીતે, પાકિસ્તાનની ટીમને પણ ભારતમાં દ્વિપક્ષીય મેચો રમવા દેવામાં આવશે નહીં.
 * બહુપક્ષીય ટુર્નામેન્ટમાં છૂટ: ભારતીય ટીમને એશિયા કપ જેવી બહુપક્ષીય ટુર્નામેન્ટમાં પાકિસ્તાન સામે રમવાથી રોકવામાં આવશે નહીં. આ નિર્ણય આંતરરાષ્ટ્રીય રમતગમત સંસ્થાઓના નિયમો અને ભારતીય ખેલાડીઓના હિતોને ધ્યાનમાં રાખીને લેવામાં આવ્યો છે.
 * આયોજન માટે સરળતા: ભારતમાં યોજાતા આંતરરાષ્ટ્રીય કાર્યક્રમો માટે પાકિસ્તાની ખેલાડીઓ અને ટીમોને વિઝા પ્રક્રિયા સરળ બનાવીને મંજૂરી આપવામાં આવશે. આ પગલું ભારતને વિશ્વસનીય આંતરરાષ્ટ્રીય યજમાન તરીકે સ્થાપિત કરવામાં મદદ કરશે.
 * ઓલિમ્પિક ચાર્ટરનું પાલન: રમતગમત મંત્રાલયે જણાવ્યું છે કે આ નવી નીતિ ઓલિમ્પિક ચાર્ટરનું પાલન કરે છે, જે તમામ દેશોના રમતવીરોને આંતરરાષ્ટ્રીય સ્પર્ધાઓમાં ભાગ લેવા દે છે.
આ નીતિ પાકિસ્તાન પ્રત્યેના ભારતના એકંદર વલણને રમતગમતના ક્ષેત્રમાં પ્રતિબિંબિત કરે છે અને સ્પષ્ટતા કરે છે કે રાજકીય તણાવ હોવા છતાં, ભારત આંતરરાષ્ટ્રીય રમતગમતના નિયમોનું પાલન કરવાનું ચાલુ રાખશે.