દયે છે ઇન્કમટેક્ષ : લ્યે છે મફત રાશન
૧.૧૭ કરોડ સંપન્ન લોકો કેન્દ્રના નિશાના પર
નવી દિલ્હી, તા.૨૨: દરેક સરકારી યોજનાના લાભાર્થીઓમાં નકલી અથવા અયોગ્ય લોકોને સાફ કરવાના અભિયાનમાં રોકાયેલી કેન્દ્રની નરેન્દ્ર મોદી સરકારે ફરી એકવાર ગરીબ કલ્યાણ યોજના હેઠળ ગેરકાયદેસર રીતે મફત રાશન લેતા લોકોની ઓળખ કરી છે. કેન્દ્રની તપાસમાં બહાર આવ્યું છે કે લગભગ ૧.૧૭ કરોડ લોકો જે આવકવેરો ભરે છે, ફોર વ્હીલર ધરાવે છે અથવા કોઈ કંપનીના ડિરેક્ટર છે તેઓ મોદી સરકારની મફત રાશન યોજનાનો લાભ લઈ રહ્યા છે. કેન્દ્રએ ટેકનોલોજીનો ઉપયોગ કરીને ડેટાનું વિશ્લેષણ કરીને આવા અયોગ્ય લોકોની ઓળખ કરી છે. આ અયોગ્ય લાભાર્થીઓની યાદી રાજ્યોને મોકલવામાં આવી છે અને તેને જમીન પર ચકાસવા અને નામ દૂર કરવા માટે કાર્યવાહી કરવા કહેવામાં આવ્યું છે. આ યાદીની ચકાસણીનું કામ રાજ્યોમાં ચાલી રહ્યું છે.
હકીકતમાં, મોદી સરકાર લાંબા સમયથી મફત રાશન યોજના ચલાવી રહી છે. આમાં, કોરોના સમયગાળા પહેલા અને ત્યારથી ૮૦ કરોડથી વધુ લોકોને રાહત દરે મફત અનાજ એટલે કે ઘઉં-ચોખા આપવામાં આવી રહ્યા છે. કેન્દ્ર સરકારના ખાદ્ય અને પુરવઠા વિભાગે ગયા મહિને આવા અયોગ્ય કાર્ડ ધારકોની યાદી રાજ્ય સરકારોને મોકલી છે.
૫ ઓગસ્ટના રોજ, ખાદ્ય અને ગ્રાહક બાબતોના મંત્રાલયે કોંગ્રેસના સાંસદ મુકુલ વાસનિક અને દિગ્વિજય સિંહના -‘ના જવાબમાં જણાવ્યું હતું કે ૨૦૧૯ થી ૨૦૨૩ દરમિયાન ૨.૧૮ કરોડ અયોગ્ય રેશનકાર્ડને યાદીમાંથી દૂર કરવામાં આવ્યા છે. દૂર કરવા માટે આપવામાં આવેલા કારણોમાં અયોગ્ય રેકોર્ડ, ડુપ્લિકેટ, મળત્યુનો સમાવેશ થાય છે.
કોણ અપાત્ર ?
કેન્દ્ર અથવા રાજ્ય સરકારના સરકારી કર્મચારીઓ
૧ લાખ રૂપિયા કે તેથી વધુ વાર્ષિક આવક ધરાવતા પરિવારો
ચાર પૈડાવાળા વાહન માલિકો
આવકવેરાના ચૂકવનારાઓ
કંપનીમાં ડિરેક્ટર.
(11:37 AM IST)
છેલ્લા 8 દિવસમાં સૌથી લોકપ્રિય 
