અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ભારત પર ૫૦% ટેરિફ લાદવાની જાહેરાત બાદ ભારતે મોટું પગલું ભર્યું છે. ભારતના ડાક વિભાગે 25 ઓગસ્ટ, ૨૦૨૫થી અમેરિકા માટે મોટાભાગની આંતરરાષ્ટ્રીય ટપાલ સેવાઓ અસ્થાયી રૂપે બંધ કરવાનો નિર્ણય લીધો છે. આ નિર્ણય અમેરિકાના નવા કસ્ટમ્સ નિયમો, ખાસ કરીને એક્ઝિક્યુટિવ ઓર્ડર નં. ૧૪૩૨૪ હેઠળ લાગુ કરાયેલા નિયમોને કારણે લેવાયો, જેમાં ૮૦૦ ડોલર સુધીની ડ્યુટી-ફ્રી મર્યાદા રદ કરવામાં આવી છે. આ નિયમો હેઠળ, ૧૦૦ ડોલરથી ઓછી કિંમતની ભેટો સિવાયની તમામ વસ્તુઓ પર કસ્ટમ્સ ડ્યુટી લાગુ થશે. એક અહેવાલ મુજબ, અમેરિકન કેરિયર્સે આ નિયમોના અમલીકરણની વિગતો નક્કી ન થતાં આંતરરાષ્ટ્રીય મેલ સ્વીકારવાની અસમર્થતા દર્શાવી છે. પરિણામે, ભારતે પત્રો, દસ્તાવેજો અને અમુક ચોક્કસ મર્ચેન્ડાઈઝ સિવાયની ટપાલ સેવાઓ સ્થગિત કરી છે. ભારતના વિદેશ મંત્રાલયે આ ટેરિફને "અન્યાયી અને અયોગ્ય" ગણાવીને રાષ્ટ્રીય હિતોનું રક્ષણ કરવા પગલાં લેવાની પ્રતિબદ્ધતા વ્યક્ત કરી છે. આ ઘટનાએ ભારત-અમેરિકા વચ્ચેના વેપાર સંબંધોમાં નવો તણાવ સર્જ્યો છે, જે બંને દેશો વચ્ચેના વ્યૂહાત્મક સંબંધોને અસર કરી શકે છે.