ગોવા: ભારતના ચીફ જસ્ટિસ (CJI) બી.આર. ગવઈએ બુલડોઝર કાર્યવાહી પર ફરી એકવાર આક્રોશ વ્યક્ત કર્યો છે. પણજીમાં આયોજિત એક કાર્યક્રમમાં તેમણે સ્પષ્ટ શબ્દોમાં કહ્યું કે કાર્યપાલિકા ન્યાયપાલિકાનું સ્થાન લઈ શકે નહીં. તેમણે ભારપૂર્વક કહ્યું કે કોઈ આરોપીને કોર્ટમાં દોષિત સાબિત કર્યા વગર તેના ઘરને તોડી પાડવું એ નાગરિકોના મૂળભૂત અધિકારોનું ઉલ્લંઘન છે.
    'ઘર ફક્ત આરોપીનું નથી...': CJI ગવઈએ યાદ અપાવ્યું કે ગયા વર્ષે સુપ્રીમ કોર્ટે 'બુલડોઝર જસ્ટિસ' પર કડક વલણ અપનાવ્યું હતું અને દેશભરમાં માર્ગદર્શિકા જાહેર કરી હતી. તેમણે કહ્યું, "અમે ખુશ છીએ કે સંવિધાનના રક્ષક તરીકે અમે એવા લોકોના અધિકારોની રક્ષા કરી શક્યા, જેમનાં ઘર કાયદાકીય પ્રક્રિયાનું પાલન કર્યા વિના તોડી પાડવામાં આવ્યા હતા."
   તેમણે  કહ્યું કે ઘર ફક્ત આરોપીનું જ નથી હોતું, પરંતુ તેમાં તેના પરિવારના સભ્યો પણ રહે છે. આવા સંજોગોમાં, કોઈ સુનાવણી અને કોર્ટના આદેશ વગર, સમગ્ર પરિવારે સજા ભોગવવી પડે છે, જ્યારે તેમનો કોઈ વાંક હોતો નથી.
   ન્યાયતંત્ર અને કાર્યપાલિકાની સીમાઓ: ગવઈએ પોતાના સંબોધનમાં સંવિધાનના મૂળ સિદ્ધાંત 'સત્તાનું વિભાજન' (Separation of Powers) પર ભાર મૂક્યો. તેમણે કહ્યું કે જો કાર્યપાલિકાને જ ન્યાયાધીશ બનવા દેવામાં આવે તો તે સત્તાના વિભાજનની મૂળભૂત કલ્પના પર સીધો હુમલો થશે. તેમણે કહ્યું, "અમે સુનિશ્ચિત કર્યું કે કાર્યપાલિકા ન્યાયાધીશની ભૂમિકા ન ભજવી શકે. કાયદાનંિ શાસન સર્વોપરી છે અને આ જ લોકશાહીની અસલી શક્તિ છે."
  તેમણે આરક્ષણમાં 'ક્રીમી લેયર' અને 'ઉપ-વર્ગીકરણ' પરના પોતાના અન્ય ચર્ચિત નિર્ણયનો પણ ઉલ્લેખ કર્યો. તેમણે કહ્યું કે ન્યાયાધીશે નિર્ણય લેતી વખતે સમાજની ઇચ્છાઓથી નહીં, પરંતુ કાયદા અને અંતરાત્માના અવાજથી માર્ગદર્શન લેવું જોઈએ