જમ્મુના ડોડામાં તબાહીનું તાંડવ : વાદળ ફાટતા ૪ના મોત : મકાનો - કાર તણાયા
રેસ્કયુ ઓપરેશન ચાલુ : પર્વતીય વિસ્તારોમાં નદીનું રૌદ્ર સ્વરૂપ : ગામમાં પાણી ઘૂસ્યા
જમ્મુ, તા.૨૬: જમ્મુ-કાશ્મીરના ડોડામાં વાદળ ફાટવાથી ભારે તબાહી મચી ગઈ છે. અચાનક આવેલા પૂરમાં દસથી વધુ ઘરો નાશ પામ્યા છે. વિસ્તારમાં રાહત અને બચાવ કામગીરી હાથ ધરવામાં આવી રહી છે. વહીવટીતંત્ર શકય તેટલી વહેલી તકે લોકો સુધી પહોંચવાનો પ્રયાસ કરી રહ્યું છે. અહેવાલો અનુસાર, ડોડામાં ચિનાબ નદી ખૂબ જ ખતરનાક સ્તરે વહી રહી છે. બંધોને કોઈ નુકસાન ન થાય તે માટે બાઘલિયાર પાવર પ્રોજેક્ટ અને સલાલ પ્રોજેક્ટના દરવાજા ખોલવામાં આવી શકે છે.
પ્રશાસન દ્વારા સાંજ સુધી ભારે વરસાદનું એલર્ટ જારી કરવામાં આવ્યું છે. આવી સ્થિતિમાં, રાહત કાર્યમાં પણ અવરોધ આવી શકે છે. વાદળ ફાટયા પછી, વિસ્તારમાં પૂર દેખાઈ રહ્યું છે, જેના કારણે રસ્તામાં આવતા વળક્ષો અને ઘરોને ભારે નુકસાન થયું છે. ડોડામાં વાદળ ફાટયા બાદ ઘણા ઘરો ધોવાઈ ગયા છે અને કેટલાક ઘરોને નુકસાન થયું છે. કુદરતના પ્રકોપમાં સ્થાનિક લોકોની જીવનભરની કમાણી ખોવાઈ ગઈ છે. જિલ્લાના ઉપરના ભાગમાં નાશ પામેલા ઘરોમાંથી સ્થાનિક લોકોને તેમની કિંમતી વસ્તુઓ કાઢીને સલામત સ્થળે જવાની ફરજ પડી છે.
વીડિયોમાં પાણીનો જોરદાર પ્રવાહ જોઈ શકાય છે. વિસ્તારની નદીઓ ઉભરાઈ ગઈ છે અને પાણી બજારોમાં ઘૂસી ગયું છે. આવી સ્થિતિમાં, કોઈપણ અકસ્માત ટાળવા માટે ઘણા રસ્તાઓ બંધ કરવા પડ્યા છે. વહીવટીતંત્રે અસરગ્રસ્ત વિસ્તારમાંથી લોકોને સુરક્ષિત સ્થળોએ ખસેડવાનું પણ શરૂ કરી દીધું છે.
રામબન વિસ્તારમાં ભારે ભૂસ્ખલનને કારણે જમ્મુ-શ્રીનગર રાષ્ટ્રીય ધોરીમાર્ગ બંધ થઈ ગયો છે. ભારે વરસાદની સાથે જમ્મુમાં ભારે પવન ફૂંકાઈ રહ્યો છે અને તાવી નદીમાંથી આવતું પૂર રહેણાંક વિસ્તારોમાં પ્રવેશી રહ્યું છે. જમ્મુમાં નદી કિનારે આવેલા ઘણા વિસ્તારો સંપૂર્ણપણે ડૂબી ગયા છે અને નુકસાન ટાળવા માટે વહીવટીતંત્રે આ વિસ્તારોને ખાલી કરાવ્યા છે.
આ પહેલાં, ઉત્તરાખંડના ધારાલીમાં વાદળ ફાટવાની ઘટનાએ આખા ગામમાં ભારે તબાહી મચાવી હતી અને પાંચથી વધુ લોકોએ જીવ ગુમાવ્યા હતા. આ અકસ્માતમાં ઘણા લોકો ગુમ પણ થયા હતા. વાદળ ફાટયા પછી આવેલા પૂરના ઘણા ભયાનક વીડિયો સામે આવ્યા હતા, જેને જોઈને આપત્તિની તીવ્રતાનો અંદાજ લગાવી શકાય છે.
૧૪ ઓગસ્ટના રોજ કિશ્તવાડના ચાશોટી ગામમાં વાદળ ફાટવાથી ભારે વિનાશ થયો હતો. આ ગામ માછૈલ માતા યાત્રાના માર્ગ પર છે, જ્યાં તે દિવસે હજારો યાત્રાળુઓ હાજર હતા. અચાનક આવેલા પૂરથી ઘરો અને દુકાનોને નુકસાન થયું હતું અને યાત્રાળુઓ માટે ગોઠવવામાં આવેલા લંગરને પણ તણાઈ ગયું હતું. આ દુર્ઘટનામાં ૬૦ થી વધુ લોકો મળત્યુ પામ્યા હતા અને ૩૦૦ થી વધુ ઘાયલ થયા હતા. આ અકસ્માતમાં ૨૦૦ થી વધુ લોકો ગુમ થયા હોવાના અહેવાલ છે.(૨૩.૨૩)
(3:04 PM IST)
છેલ્લા 8 દિવસમાં સૌથી લોકપ્રિય 
