નવી દિલ્‍હી, તા.૨૬: એન્‍ફોર્સમેન્‍ટ ડિરેક્‍ટોરેટએ દિલ્‍હી-એનસીઆરમાં રિયલ એસ્‍ટેટ જાયન્‍ટ બીપીટીપીના અનેક સ્‍થળો પર દરોડા પાડીને ખળભળાટ મચાવ્‍યો. આ કાર્યવાહી ફોરેન એક્‍સચેન્‍જ મેનેજમેન્‍ટ એક્‍ટ (FEMA) હેઠળ કરવામાં આવી હતી, જેમાં લગભગ ૫૦૦ કરોડ રૂપિયાના વિદેશી રોકાણ સંબંધિત ઉલ્લંઘનનો મામલો પ્રકાશમાં આવ્‍યો છે.

ઈડીની તાજેતરની તપાસમાં ખુલાસો થયો છે કે ફરીદાબાદની પ્રખ્‍યાત રિયલ એસ્‍ટેટ કંપની બિઝનેસ પાર્ક્‍સ ટાઉન પ્‍લાનર્સ પ્રાઇવેટ લિમિટેડ (BPTP) ને ૨૦૦૭-૦૮ દરમિયાન મોરેશિયસ કંપનીઓ પાસેથી ૫૦૦ કરોડ રૂપિયાથી વધુનું વિદેશી રોકાણ મળ્‍યું હતું. પરંતુ આ રોકાણ ‘ઓટોમેટિક રૂટ' દ્વારા લેવામાં આવ્‍યું હતું, જે FEMA નિયમોનું ઉલ્લંઘન માનવામાં આવે છે. સૂત્રોના જણાવ્‍યા અનુસાર, કંપનીએ આ રોકાણ પુટ ઓપ્‍શન/સ્‍વેપ ઓપ્‍શન દ્વારા મેળવ્‍યું હતું, જે નિયમોની વિરુદ્ધ હતું.

ED સૂત્રોએ એક સનસનાટીભર્યો ખુલાસો કર્યો છે કે BPTPના CMD કાબુલ ચાવલા પર ગુપ્ત રીતે વિદેશમાં મિલકત રાખવાનો આરોપ છે. એટલું જ નહીં, દિલ્‍હી-NCRના ઘણા પોલીસ સ્‍ટેશનોમાં કંપની અને તેના ડિરેક્‍ટરો સામે નોંધાયેલી FIR પણ EDની તપાસના દાયરામાં છે. આ મામલો હવે વધુ ઊંડો બની રહ્યો છે.

EDની આ મોટી કાર્યવાહી અંગે BPTP તરફથી હજુ સુધી કોઈ સત્તાવાર નિવેદન આવ્‍યું નથી. કંપનીનો સંપર્ક કરવાનો પ્રયાસ કરવામાં આવ્‍યો હતો, પરંતુ જવાબની રાહ જોવાઈ રહી છે. શું આ મૌન તોફાન પહેલાની શાંતિ છે? EDના આ દરોડાએ રિયલ એસ્‍ટેટ ક્ષેત્રમાં ખળભળાટ મચાવી દીધો છે. સૂત્રો કહે છે કે તપાસ હજુ પણ તેના પ્રારંભિક તબક્કામાં છે અને આગામી દિવસોમાં વધુ મોટા ખુલાસા થઈ શકે છે.(૨૩.૨૨)