૩૧મીએ મોદી-જિનપિંગ મળશે
SCO કોન્ફરન્સ દરમિયાન મુલાકાત થશે
નવી દિલ્હી, તા.૨૮: પ્રધાનમંત્રી નરેન્દ્ર મોદી અને ચીનના રાષ્ટ્રપતિ શી જિનપિંગ ૩૧ ઓગસ્ટના રોજ ચીનના તિયાનજિનમાં યોજાનારી શાંઘાઈ કોઓપરેશન ઓર્ગેનાઇઝેશન (SCO) કોન્ફરન્સ દરમ્યાન મળશે. આ દ્વિપક્ષીય બેઠક ભારત અને ચીન વચ્ચેના સંબંધોને લઈને મહત્વપૂર્ણ માનવામાં આવે છે. બંને નેતાઓ ઘણા મુદ્દાઓ પર ચર્ચા કરી શકે છે, જેમાં અમેરિકન ટેરિફ અને પ્રાદેશિક સહયોગ જેવા વિષયો શામેલ હોઈ શકે છે. તે જ સમયે, પીએમ મોદી અને રશિયન રાષ્ટ્રપતિ વ્લાદિમીર પુતિનની દ્વિપક્ષીય મુલાકાત ૧ સપ્ટેમ્બરના રોજ તિયાનજિનમાં જ, SCO સમિટની બાજુમાં યોજાશે.
આ બે દિવસીય શિખર સંમેલન ૩૧ ઓગસ્ટથી ૧ સપ્ટેમ્બર સુધી યોજાશે, જેમાં ૨૦ થી વધુ વૈશ્વિક નેતાઓ ભાગ લેશે. રશિયાના રાષ્ટ્રપતિ વ્લાદિમીર પુતિન પણ આમાં હાજર રહેશે. વર્તમાન ભૂ-રાજકીય તણાવ વચ્ચે આ પરિષદને વૈશ્વિક દક્ષિણની એકતાનું પ્રદર્શન માનવામાં આવે છે. મધ્ય એશિયા, મધ્ય પૂર્વ, દક્ષિણ એશિયા અને દક્ષિણપૂર્વ એશિયાના નેતાઓને પણ તેમાં આમંત્રણ આપવામાં આવ્યું છે.
વડાપ્રધાન નરેન્દ્ર મોદીની ચીન મુલાકાતના સાત વર્ષ પછી આ મુલાકાત પહેલી વાર થશે. આ એવા સમયે થઈ રહ્યું છે જ્યારે દિલ્હી અને બેઇજિંગ ૨૦૨૦ ની ઘાતક સરહદ અથડામણ પછી તણાવ ઘટાડવાનો પ્રયાસ કરી રહ્યા છે.
મોદી છેલ્લે ૨૦૨૪ માં રશિયાના કાઝાનમાં બ્રિક્સ સમિટમાં શી જિનપિંગ અને પુતિન સાથે જોવા મળ્યા હતા. તે સમયે યુક્રેન યુદ્ધને કારણે પશ્ચિમી નેતાઓએ મોસ્કોથી અંતર રાખ્યું હતું. તાજેતરમાં નવી દિલ્હીમાં રશિયન રાજદ્વારીઓએ સંકેત આપ્યો હતો કે મોસ્કો ભારત, ચીન અને રશિયા વચ્ચે ત્રિપક્ષીય વાટાઘાટોની આશા રાખી રહ્યું છે.
આ વર્ષની શિખર સંમેલન ૨૦૦૧ માં શાંઘાઈ કોઓપરેશન ઓર્ગેનાઇઝેશન (SCO) ની સ્થાપના પછી અત્યાર સુધીની સૌથી મોટી હશે. ચીનના વિદેશ મંત્રાલયના એક અધિકારીએ ગયા અઠવાડિયે આ માહિતી આપી હતી અને આ સંગઠનને નવા પ્રકારના આંતરરાષ્ટ્રીય સંબંધોના નિર્માણમાં એક મહત્વપૂર્ણ બળ ગણાવ્યું હતું.
શરૂઆતમાં આ સંગઠન છ યુરેશિયન દેશોના જૂથ તરીકે રચાયું હતું, પરંતુ તાજેતરના વર્ષોમાં તે ૧૦ કાયમી સભ્યો અને ૧૬ સંવાદ અને નિરીક્ષક દેશો સુધી વિસ્તર્યું છે. તેનો વ્યાપ સુરક્ષા અને આતંકવાદ વિરોધી સહયોગથી આગળ વધીને આર્થિક અને લશ્કરી સહયોગ સુધી વિસ્તર્યો છે.(૨૩.૩૪)
(2:59 PM IST)
છેલ્લા 8 દિવસમાં સૌથી લોકપ્રિય 
