નવી દિલ્હી : રશિયાના રાષ્ટ્રપતિ વ્લાદિમીર પુતિન ડિસેમ્બર 2025માં ભારતની મુલાકાતે આવશે. ક્રેમલિને આ વાતની પુષ્ટિ કરી. આ મુલાકાત ભારત અને રશિયા વચ્ચેના સંબંધોને વધુ મજબૂત બનાવવા માટે હશે. આ સમાચાર એવા સમયે આવ્યા છે જ્યારે અમેરિકાએ રશિયા પાસેથી ભારતની તેલ ખરીદી પર 50% ટેરિફ લાદ્યો છે. ક્રેમલિનના અધિકારી યુરી ઉષાકોવે જણાવ્યું હતું કે પુતિન સોમવારે ચીનમાં એક પ્રાદેશિક પરિષદ દરમિયાન વડા પ્રધાન નરેન્દ્રભાઈ  મોદીને મળશે. આ દરમિયાન, બંને નેતાઓ ડિસેમ્બરની મુલાકાતની તૈયારીઓ અંગે ચર્ચા કરશે.

ગયા મહિને, ભારતના રાષ્ટ્રીય સુરક્ષા સલાહકાર (NSA) અજિત ડોભાલે પણ પુતિનની ભારત મુલાકાતની પુષ્ટિ કરી હતી. તેમણે કહ્યું હતું કે, 'અમારા રશિયા સાથે ખાસ અને લાંબા સમયથી સંબંધો છે, અને અમે આ સંબંધને ખૂબ મહત્વ આપીએ છીએ.' ડોભાલનું આ નિવેદન રશિયાની તેમની મુલાકાત પછી આવ્યું હતું, જ્યાં તેમણે ઊર્જા અને સંરક્ષણ ક્ષેત્રોમાં દ્વિપક્ષીય સહયોગ પર ચર્ચા કરી હતી. આ મુલાકાત અમેરિકા અને ભારત વચ્ચે તણાવના સમયે આવી હતી, કારણ કે યુએસ રાષ્ટ્રપતિ ડોનાલ્ડ ટ્રમ્પે ભારત દ્વારા રશિયન તેલની ખરીદી પર 25% વધારાનો ટેરિફ લાદ્યો હતો.

અમેરિકાના રાષ્ટ્રપતિ ડોનાલ્ડ ટ્રમ્પે ભારત પર ૫૦% ટેરિફ લાદ્યો કારણ કે ભારત રશિયા પાસેથી તેલ ખરીદી રહ્યું છે. ટ્રમ્પે અગાઉ ભારત પર રશિયા પાસેથી સસ્તું તેલ ખરીદે છે અને તેનો મોટો હિસ્સો ખુલ્લા બજારમાં નફા માટે વેચવાનો પણ આરોપ લગાવ્યો હતો. તેમણે કહ્યું હતું કે, 'યુક્રેનમાં રશિયન યુદ્ધને કારણે કેટલા લોકો મરી રહ્યા છે તેની ભારતને પરવા નથી.'

આ મહિનાની શરૂઆતમાં, પુતિને પીએમ મોદીને ફોન કર્યો હતો. આ દરમિયાન તેમણે યુક્રેન યુદ્ધ પર અલાસ્કામાં ટ્રમ્પ સાથેની તેમની મુલાકાત વિશે માહિતી આપી હતી. ફોન વાતચીતમાં, મોદીએ યુક્રેન મુદ્દા પર ભારતના વલણને પુનરાવર્તિત કર્યું, જેમાં તેમણે શાંતિ માટે રાજદ્વારી અને સંવાદ પર ભાર મૂક્યો. બંને નેતાઓએ ભારત અને રશિયા વચ્ચે ખાસ વ્યૂહાત્મક ભાગીદારીને વધુ મજબૂત બનાવવા માટે ઘણા મુદ્દાઓ પર ચર્ચા કરી.

આ વર્ષની શરૂઆતમાં, રશિયન વિદેશ પ્રધાન સેરગેઈ લાવરોવે પણ 2025 માં પુતિનની ભારત મુલાકાતની પુષ્ટિ કરી હતી. યુક્રેન યુદ્ધ શરૂ થયા પછી (ફેબ્રુઆરી 2022) આ મુલાકાત પુતિનની ભારતની પહેલી મુલાકાત હશે. લાવરોવે એપ્રિલમાં કહ્યું હતું કે આ મુલાકાતની તૈયારીઓ ચાલી રહી છે, જોકે તે સમયે તારીખ નક્કી કરવામાં આવી ન હતી. તમને જણાવી દઈએ કે પુતિન છેલ્લે ડિસેમ્બર 2021 માં ભારત ગયા હતા, જ્યારે રશિયાએ યુક્રેન પર હુમલો કરવાનું શરૂ કર્યું ન હતું.

ભારત અને રશિયા વચ્ચે લાંબા સમયથી ગાઢ સંબંધો રહ્યા છે. આ મુલાકાત બંને દેશો વચ્ચે વેપાર, સંરક્ષણ અને ઉર્જા જેવા ક્ષેત્રોમાં સહયોગને વધુ વધારવાની તક પૂરી પાડશે. પુતિનની મુલાકાત માત્ર દ્વિપક્ષીય સંબંધોને જ મજબૂત બનાવશે નહીં પરંતુ વૈશ્વિક મંચ પર ભારતની રાજદ્વારી સ્થિતિને પણ મજબૂત બનાવશે.