યમનની રાજધાની સનામાં હુથી-નિયંત્રિત સરકારના વડા પ્રધાન અહેમદ અલ-રાહવીનું ઇઝરાયલી હવાઈ હુમલામાં મોત થયું હતું. બળવાખોર સશસ્ત્ર જૂથ હુથીએ શનિવારે એક નિવેદનમાં જણાવ્યું હતું કે ગુરુવારે થયેલા હુમલામાં અલ-રાહવી અન્ય ઘણા મંત્રીઓ સાથે માર્યા ગયા હતા. જૂથે જણાવ્યું હતું કે આ હુમલો ત્યારે થયો જ્યારે અધિકારીઓ છેલ્લા એક વર્ષમાં સરકારના પ્રદર્શનની સમીક્ષા કરવા માટે એક વર્કશોપમાં ભાગ લઈ રહ્યા હતા.  

હુથી બળવાખોરોએ જણાવ્યું હતું કે અલ-રાહવી ઓગસ્ટ 2024 થી હુથીના નેતૃત્વ હેઠળની સરકારના વડા પ્રધાન હતા. ગયા વર્ષે સરકારની પ્રવૃત્તિઓ અને કામગીરીનું મૂલ્યાંકન કરવા માટે આયોજિત નિયમિત વર્કશોપ દરમિયાન તેમને અન્ય મંત્રીઓ સાથે નિશાન બનાવવામાં આવ્યા હતા. તે જ સમયે, ઇઝરાયેલી સેનાએ કહ્યું કે તેણે યમનના સના ક્ષેત્રમાં હુથી આતંકવાદી શાસનના લશ્કરી મથક પર ચોક્કસ હુમલો કર્યો હતો.

આ હુમલો ત્યારે થયો જ્યારે ટોચના નેતાઓ એક એપાર્ટમેન્ટમાં રાષ્ટ્રીય સ્તરે પ્રસારિત ભાષણ કાર્યક્રમ જોઈ રહ્યા હતા. યમનની એક ચેનલે અહેવાલ આપ્યો છે કે હુતી વડા પ્રધાન અલ-રાહવી તેમના ઘણા સહાયકો સાથે એક એપાર્ટમેન્ટમાં હતા. હુતી સંરક્ષણ પ્રધાન મોહમ્મદ નાસેર અલ-અતીફી અને ચીફ ઓફ સ્ટાફ મોહમ્મદ અબ્દુલ-કરીમ અલ-ઘમારી પણ આ હુમલામાં માર્યા ગયા હોવાની શક્યતા છે.

  ગાઝામાં હમાસ સામેના યુદ્ધ દરમિયાન હુથીઓએ ઇઝરાયલ પર વારંવાર મિસાઇલો છોડી છે. હુથી બળવાખોરોનું કહેવું છે કે આ હુમલાઓ પેલેસ્ટિનિયનો સાથે એકતા દર્શાવવા માટે કરવામાં આવી રહ્યા છે. જોકે, યમનથી છોડવામાં આવેલી મોટાભાગની મિસાઇલોને ઇઝરાયલે અટકાવી હતી અને તેને હવામાં જ નષ્ટ કરી દીધી હતી. હુથી સંચાલિત આરોગ્ય મંત્રાલય અને સરકારી અધિકારીઓના જણાવ્યા અનુસાર, આ અઠવાડિયાની શરૂઆતમાં ઇઝરાયલી હુમલાઓમાં સનાના ઘણા વિસ્તારોને નિશાન બનાવવામાં આવ્યા હતા. ઓછામાં ઓછા 10 લોકો માર્યા ગયા હતા અને 102 અન્ય ઘાયલ થયા હતા.