નવી દિલ્હી: ભારતીય વાયુસેનાના ડેપ્યુટી ચીફ એર માર્શલ નર્મદેશ્વર તિવારીએ આજે એક સંરક્ષણ સમિટમાં *'ઓપરેશન સિંદૂર'*નું રહસ્ય જાહેર કર્યું, જેમાં તેમણે જણાવ્યું કે શા માટે પાકિસ્તાને ફક્ત ૫૦ કરતાં ઓછા હથિયારોના હુમલા બાદ યુદ્ધવિરામ માટે વિનંતી કરવી પડી. 
પહેલગામ આતંકવાદી હુમલા પછી, ભારતે ૭ મે, ૨૦૨૫ના રોજ પાકિસ્તાન સામે 'ઓપરેશન સિંદૂર' શરૂ કર્યું હતું. આ ઓપરેશનનો ઉદ્દેશ્ય પાકિસ્તાન દ્વારા સંચાલિત આતંકવાદી માળખાને નષ્ટ કરવાનો હતો. આ ઓપરેશન પછી, ભારત અને પાકિસ્તાન વચ્ચે ૪ દિવસ સુધી ભારે અથડામણો થઈ હતી. 
એર માર્શલ તિવારીએ જણાવ્યું કે ભારતીય વાયુસેનાએ ૯ અને ૧૦ મેની રાત્રે પાકિસ્તાની સેનાના ઠેકાણાઓ પર હુમલો કરીને તેમને ચારે બાજુથી ઘેરી લીધા હતા. તેમણે કહ્યું કે, "૫૦ કરતાં ઓછા હથિયારો સાથે, અમે પાકિસ્તાનની કમર તોડી નાખી. આ એક મોટી સિદ્ધિ હતી કારણ કે ૧૯૭૧ના યુદ્ધ દરમિયાન પણ કેટલાક ઠેકાણાઓ પર હુમલો કરવામાં આવ્યો ન હતો."
તિવારીએ ઉમેર્યું કે ભારતીય વાયુસેનાએ દરેક ઉપલબ્ધ હથિયારનો ઉપયોગ કરીને સચોટ લક્ષ્ય પર હુમલો કર્યો. આ હુમલાઓ એટલા અસરકારક હતા કે ૧૦ મેના રોજ બપોરે ઇસ્લામાબાદને લશ્કરી કાર્યવાહી બંધ કરવા માટે વિનંતી કરવી પડી.
આ ચુસ્ત અને નિર્ણાયક કાર્યવાહીએ સાબિત કરી દીધું કે ભારતીય સેના કોઈ પણ પરિસ્થિતિનો સામનો કરવા સક્ષમ છે અને દેશની સુરક્ષા માટે પ્રતિબદ્ધ છે.