ચંદીગઢ ૩૦ ઓગસ્ટ, ૨૦૨૫: સ્વઘોષિત સંત રામપાલને પંજાબ અને હરિયાણા હાઈકોર્ટે મોટી રાહત આપી છે. વર્ષ ૨૦૧૪ના આશ્રમની અંદર મહિલા અનુયાયીઓના મૃત્યુના કેસમાં તેમને મળેલી આજીવન કેદની સજા પર હાઈકોર્ટે સ્ટે મૂકી દીધો છે. આ નિર્ણય રામપાલ માટે જેલમાંથી મુક્તિનો માર્ગ મોકળો કરી શકે છે.
 
કોર્ટનો નિર્ણય અને કારણો
ન્યાયાધીશ ગુરવિંદર સિંહ ગિલ અને ન્યાયાધીશ દીપેન્દ્ર સિંહ નલવાની ડિવિઝન બેન્ચે રામપાલની અરજી પર સુનાવણી કરતા જણાવ્યું કે, રામપાલ પર મહિલાઓને આશ્રમમાં બંધક બનાવવાનો આરોપ છે, પરંતુ મૃત્યુના તબીબી પુરાવા અંગે ગંભીર વાંધાજનક મુદ્દાઓ છે. રામપાલ ૭૪ વર્ષના છે અને તે પહેલાથી જ ૧૦ વર્ષ અને ૨૭ દિવસની સજા ભોગવી ચૂક્યા છે. આ ઉપરાંત, મૃતકના પતિ અને સાસુએ પણ ફરિયાદ પક્ષને ટેકો આપ્યો ન હતો, જે મુખ્ય મુદ્દો છે.
 
વકીલની દલીલ અને સરકારી વિરોધ
રામપાલના વકીલે દલીલ કરી હતી કે આ મૃત્યુ ન્યુમોનિયાને કારણે થયું હતું અને તે એક કુદરતી ઘટના હતી. તેમણે એ પણ દલીલ કરી કે અન્ય ૧૩ સહ-આરોપીઓને જામીન મળી ચૂક્યા છે, તેથી રામપાલને પણ રાહત મળવી જોઈએ.

જોકે, રાજ્ય સરકારે આ અરજીનો સખત વિરોધ કર્યો હતો. સરકારે દાવો કર્યો હતો કે મહિલાઓનું મૃત્યુ ગૂંગળામણને કારણે થયું હતું, અને તેમને આશ્રમમાં પૂરતું ભોજન કે સુવિધા આપવામાં આવી ન હતી.
 
રામપાલનો વિવાદિત ઇતિહાસ
હરિયાણા સરકારના સિંચાઈ વિભાગમાં જુનિયર એન્જિનિયર (JE)ની નોકરી છોડીને બાબા બનેલા રામપાલનું જીવન વિવાદોથી ભરેલું રહ્યું છે. ૨૦૦૬માં આર્ય સમાજ સાથેના સંઘર્ષ બાદ તેમના પર હત્યાનો કેસ નોંધાયો હતો. ૨૦૧૪માં કોર્ટમાં હાજર ન થવા બદલ તેમની ધરપકડનો આદેશ જારી થયો હતો, જે બાદ આશ્રમમાં પોલીસ અને અનુયાયીઓ વચ્ચે અથડામણ થઈ હતી, જેમાં ૬ લોકોના મોત થયા હતા. તે પછી તેમની ધરપકડ કરવામાં આવી હતી અને ૨૦૧૮માં તેમને આજીવન કેદની સજા ફટકારવામાં આવી હતી. હાલમાં, હાઈકોર્ટનો આ આદેશ મુખ્ય અપીલના નિકાલ સુધી અમલમાં રહેશે.