પશ્ચિમ બંગાળમાં વિધાનસભા ચૂંટણી નજીક આવતા રાજકીય વાતાવરણ ગરમાયું છે. આ દરમિયાન મમતા બેનર્જીની સરકાર પર ઇસ્લામિક સંગઠનોના દબાણ સામે ઝૂકવાનો ગંભીર આરોપ લાગ્યો છે. કોલકાતામાં આયોજિત 'હિન્દી સિનેમામાં ઉર્દૂ' શીર્ષકવાળા સાહિત્ય મહોત્સવમાં પ્રખ્યાત ગીતકાર અને કવિ જાવેદ અખ્તરને આમંત્રણ આપવામાં આવ્યું હતું, પરંતુ મુસ્લિમ સંગઠનોના વિરોધ બાદ આ કાર્યક્રમ રદ કરી દેવાયો છે.
 
જમિયત ઉલેમા-એ-હિંદની ખુલ્લી ચેતવણી
મહોત્સવમાં જાવેદ અખ્તરને મુખ્ય મહેમાન તરીકે બોલાવવામાં આવતા, કોલકાતાના બે મુખ્ય ઇસ્લામિક સંગઠનો, જમિયત ઉલેમા-એ-હિંદ અને વહિયાન ફાઉન્ડેશનએ તેનો સખત વિરોધ કર્યો. તેમણે જાવેદ અખ્તરને 'ધર્મ અને ભગવાન વિરુદ્ધ બોલનાર' વ્યક્તિ ગણાવ્યા. જમિયત ઉલેમા-એ-હિંદે તો ૨૦૦૭માં તસ્લીમા નસરીન સામે થયેલા વિરોધ જેવો 'લોકશાહી વિરોધ' કરવાની ચેતવણી પણ આપી.

કાર્યક્રમ રદ થવા પાછળનું કારણ
સત્તાવાર રીતે, ઉર્દૂ એકેડેમીએ 'અનિવાર્ય સંજોગો'ને કારણે કાર્યક્રમ મુલતવી રાખ્યો હોવાનું જણાવ્યું, પરંતુ સૂત્રોના જણાવ્યા અનુસાર, મમતા બેનર્જીની સરકાર ચૂંટણી પહેલા કોઈ પણ પ્રકારનો તણાવ ટાળવા માગતી હતી. સરકારને ભય હતો કે જાવેદ અખ્તર પર શાહી ફેંકવા જેવી કોઈ ઘટના ન બને અથવા કોઈ મોટો સાંપ્રદાયિક વિવાદ ઊભો ન થાય.

વિરોધમાં બુદ્ધિજીવીઓ
કાર્યક્રમ રદ થવા પર અનેક બુદ્ધિજીવીઓ અને કાર્યકર્તાઓએ આક્રોશ વ્યક્ત કર્યો. માનવાધિકાર કાર્યકર્તા શબનમ હાશ્મીએ કહ્યું કે ભારતમાં નાસ્તિકોને પણ પોતાના વિચારો વ્યક્ત કરવાનો અધિકાર છે. કવિ ગૌહર રઝાએ આ પગલાને 'અત્યંત ચિંતાજનક અને અસ્વીકાર્ય' ગણાવ્યું અને કહ્યું કે આ દર્શાવે છે કે કટ્ટરપંથીઓ, ભલે તે હિન્દુ હોય કે મુસ્લિમ, તર્કના અવાજને દબાવવા માટે એકસરખા પ્રતિબદ્ધ છે.

માર્કસવાદી કમ્યુનિસ્ટ પાર્ટી સાથે જોડાયેલા મયૂખ બિસ્વાસે કહ્યું કે, ઉર્દૂ એકેડેમી કરદાતાઓના પૈસા પર ચાલે છે, તે જમિયતની ખાનગી મિલકત નથી. આ ઘટનાથી રાજ્યમાં રાજકીય અને સામાજિક તણાવ વધુ વધી રહ્યો છે.