મુંબઈ : બોલિવૂડના જાણીતા ફિલ્મ નિર્માતા સંજય લીલા ભણસાલી અને તેમની આગામી ફિલ્મ 'લવ એન્ડ વોર' ની ટીમના સભ્યો સામે ગંભીર આરોપો લાગ્યા છે. રાજસ્થાનના બિકાનેરમાં બિછવાલ પોલીસ સ્ટેશનમાં તેમની સામે છેતરપિંડી, ગેરવર્તણૂક અને વિશ્વાસભંગના આરોપસર FIR નોંધાઈ છે. આ કેસ લાઇન પ્રોડ્યુસર તરીકે કામ કરી રહેલા પ્રતીક રાજ માથુર દ્વારા દાખલ કરવામાં આવ્યો છે.
 
શું છે સમગ્ર મામલો?
અહેવાલ મુજબ, ફરિયાદી પ્રતીક રાજ માથુરે દાવો કર્યો છે કે તેને ફિલ્મમાં લાઇન પ્રોડ્યુસર તરીકેનો કોન્ટ્રાક્ટ આપવામાં આવ્યો હતો. જોકે, ભણસાલી અને તેમની ટીમના બે સભ્યોએ તેને આ પદ પરથી કોઈ પણ પ્રકારના વળતર વગર દૂર કરી દીધો. બિકાનેર સદરના સર્કલ ઓફિસર વિશાલ જાંગીડએ આ બાબતની પુષ્ટિ કરતા જણાવ્યું કે માથુરે નિર્દેશક અને તેમની ટીમના સભ્યો પર છેતરપિંડીનો આરોપ લગાવ્યો છે.

આ ફિલ્મનું શૂટિંગ તાજેતરમાં બિકાનેરમાં શરૂ થયું હતું, અને હવે આ FIRના કારણે ફિલ્મના નિર્માણ કાર્યમાં વિઘ્ન પડી શકે છે. ભણસાલી પ્રોડક્શન્સ તરફથી આ મામલે કોઈ સત્તાવાર નિવેદન આવ્યું નથી. આ ઘટના ભણસાલીની ફિલ્મના ચાહકો માટે પણ આશ્ચર્યજનક છે, કારણ કે 'લવ એન્ડ વોર'નું કાસ્ટિંગ અને મોટા બજેટના કારણે તે પહેલેથી જ ચર્ચામાં છે.