નવી દિલ્હી : યુક્રેન યુદ્ધને શાંત કરવાના પ્રયાસોમાં ભારતની ભૂમિકા હવે નિર્ણાયક બની રહી છે. જે યુરોપિયન દેશોએ શરૂઆતમાં રશિયાને અલગ પાડવાનો પ્રયાસ કર્યો હતો, તે હવે શાંતિની વાતચીત માટે ભારત તરફ આશાથી જોઈ રહ્યા છે. આ ઘટનાક્રમ ભારતના વધતા વૈશ્વિક પ્રભાવનો સ્પષ્ટ સંકેત છે.

ફ્રાન્સના રાષ્ટ્રપતિ ઇમેન્યુઅલ મેક્રોન અને જર્મનીના વિદેશ મંત્રીની તાજેતરની વાતચીત બાદ હવે યુરોપિયન યુનિયન (EU) ના ટોચના બે નેતાઓ પણ વડાપ્રધાન નરેન્દ્ર મોદી સાથે ચર્ચા કરી છે. EU કમિશનના પ્રમુખ ઉર્સુલા વોન ડેર લેયેન અને યુરોપિયન કાઉન્સિલના અધ્યક્ષ એન્ટોનિયો કોસ્ટાએ પીએમ મોદી સાથે ફોન પર વાત કરી અને યુક્રેન સંકટ પર ભારતીય મધ્યસ્થીની ભૂમિકાને અત્યંત મહત્વપૂર્ણ ગણાવી છે.
 
કેમ બધાની નજર ભારત પર છે?
ભારતે શરૂઆતથી જ યુક્રેન યુદ્ધ પર સંતુલિત અને સ્વતંત્ર વલણ અપનાવ્યું છે. એક તરફ, ભારતે સંયુક્ત રાષ્ટ્રમાં યુદ્ધવિરામ અને વાતચીતની અપીલ કરી, તો બીજી તરફ તેણે પોતાના રાષ્ટ્રીય હિતોનું રક્ષણ કરતા રશિયા પાસેથી તેલ આયાત કરવાનું ચાલુ રાખ્યું. પીએમ મોદીનું "આ યુદ્ધનો યુગ નથી" જેવું નિવેદન આખી દુનિયામાં શાંતિના પ્રતીક તરીકે સ્વીકારવામાં આવ્યું. આ જ કારણ છે કે રશિયા અને યુક્રેન બંને ભારત પર વિશ્વાસ કરે છે, જ્યારે પશ્ચિમી દેશો ભારતને વાતચીત માટે એક સંભવિત 'પુલ' તરીકે જોઈ રહ્યા છે.

આ પહેલાં પણ યુક્રેનના રાષ્ટ્રપતિ ઝેલેન્સ્કીએ ઘણી વખત પીએમ મોદી સાથે સીધી વાત કરીને ભારતને મધ્યસ્થી કરવા વિનંતી કરી છે.

યુક્રેન સિવાયના અન્ય મુદ્દાઓ
યુરોપિયન નેતાઓ સાથેની વાતચીત માત્ર યુક્રેન પૂરતી સીમિત નહોતી. પીએમ મોદીએ X પર લખ્યું કે આ ચર્ચાઓમાં વેપાર, ટેકનોલોજી, રોકાણ, સંરક્ષણ અને સપ્લાય ચેઇનને મજબૂત કરવા જેવા મુદ્દાઓ પર પણ વાત થઈ. બંને પક્ષો ટૂંક સમયમાં ભારત-EU વચ્ચે મુક્ત વેપાર કરાર (FTA) પૂર્ણ કરવા માટે પણ સહમત થયા. EU માને છે કે એશિયા-પેસિફિક ક્ષેત્રમાં ભારત એક સ્થિર અને વિશ્વસનીય ભાગીદાર છે. આ તમામ ઘટનાક્રમો દર્શાવે છે કે ભારત હવે માત્ર એક પ્રાદેશિક શક્તિ નહીં, પરંતુ વૈશ્વિક મંચ પર એક નિર્ણાયક અને સંતુલિત અવાજ બની રહ્યું છે.