નવી દિલ્હી 05 સપ્ટેમ્બર, 2025: જો તમે નવી કાર કે ટુ-વ્હીલર ખરીદવાનું વિચારી રહ્યા છો, તો તમારા માટે ખુશખબર છે! સરકારના તાજેતરના GST સુધારાઓથી વાહનોની કિંમતોમાં મોટો ઘટાડો થવા જઈ રહ્યો છે. ઓટો કંપનીઓ આ ફાયદો ગ્રાહકો સુધી પહોંચાડવાની તૈયારી કરી રહી છે, જેનાથી ઓટો સેક્ટરમાં નવી જાન ફૂંકાશે.

કયા વાહન પર કેટલી બચત?
GST ના નવા માળખા હેઠળ, વિવિધ વાહનો પર મોટી બચત થશે:

• Maruti Alto: ₹36,000 સસ્તી થશે. હાલ ₹4.23 લાખની કિંમત ઘટીને ₹3.8 લાખ સુધી આવી શકે છે. આનાથી ₹40,000 કમાતા લોકો માટે પણ Alto ખરીદવી વધુ સરળ બનશે. ₹36,000 ની બચત થશે અને EMI પણ ₹1,000 સુધી ઓછી થશે.

• Hyundai Creta: આ લોકપ્રિય SUV લગભગ ₹1.1 લાખ સસ્તી થશે.

• Maruti Brezza: તેની કિંમતમાં ₹90,000 સુધીનો ઘટાડો જોવા મળશે.

• Toyota Innova: પરિવારની પસંદ એવી Innova પર પણ ગ્રાહકોને ₹2.6 લાખ સુધીની બચત થશે.

• Honda Activa: ફક્ત કાર જ નહીં, ટુ-વ્હીલર પણ સસ્તા થશે. લોકપ્રિય Activa સ્કૂટરની કિંમત ₹7,000 જેટલી ઘટશે.

• Bajaj Pulsar 150: યુવાનોની પ્રિય બાઇક Pulsar પર લગભગ ₹9,500 ની બચત થશે.

ઉદ્યોગ વિશ્લેષકોનું માનવું છે કે GSTમાં ઘટાડાના આ નિર્ણયથી વાહન વેચાણમાં મોટો ઉછાળો આવશે. મારુતિના ચેરમેન આર.સી. ભાર્ગવે કહ્યું કે આનાથી લોકોની ખરીદ શક્તિ વધશે અને બજારમાં નવી ઉર્જા આવશે. ટીવીએસના ચેરમેન સુદર્શન વેણુએ જણાવ્યું કે ટુ-વ્હીલર હવે દરેક વર્ગ માટે વધુ સુલભ બનશે.

મર્સિડીઝ-બેન્ઝ ઇન્ડિયાના એમડી સંતોષ અય્યરના મતે, આ નિર્ણય ઉપભોક્તાઓ માટે ખૂબ જ સકારાત્મક છે, કારણ કે તેમના હાથમાં વધુ પૈસા રહેશે. મહિન્દ્રા એન્ડ મહિન્દ્રાના રાજેશ જેજુરીકરે કહ્યું કે ટ્રેક્ટર અને કૃષિ મશીનરી પણ હવે ખેડૂતો માટે વધુ સસ્તું બનશે.

આ નિર્ણય ઓટો ઉદ્યોગ અને ગ્રાહકો બંને માટે તહેવારોની સિઝન પહેલા એક મોટી ભેટ સમાન છે.