કાઠમંડુ : ભયંકર હિંસા બાદ નેપાળમાં તણાવ યથાવત છે. કાઠમંડુમાં કર્ફ્યુ હોવા છતાં, મોટી સંખ્યામાં લોકો રસ્તાઓ પર ઉતરી આવ્યા છે. સેનાએ સમગ્ર સુરક્ષા વ્યવસ્થા સંભાળી લીધી છે અને પરિસ્થિતિને ધીમે ધીમે સામાન્ય બનાવવાના પ્રયાસો કરવામાં આવી રહ્યા છે. હિંસક વિરોધ પ્રદર્શનોમાં મૃત્યુઆંક પણ સતત વધી રહ્યો છે.

   નેપાળના આરોગ્ય અને વસ્તી મંત્રાલય દ્વારા જાહેર કરાયેલા આંકડા અનુસાર, વિરોધ પ્રદર્શન દરમિયાન મૃત્યુઆંક 30 થયો છે, જ્યારે ઘાયલોની સંખ્યા 1,033 પર પહોંચી ગઈ છે. નેપાળની 28 હોસ્પિટલોમાં ઘાયલોની સારવાર ચાલી રહી છે. હિંસક વિરોધ પ્રદર્શન દરમિયાન અત્યાર સુધીમાં 380 થી વધુ ઘાયલોને રજા આપવામાં આવી છે.

   નેપાળમાં કાયદો અને વ્યવસ્થા નિષ્ફળ ગઈ છે. તાજેતરના હિંસક વિરોધ પ્રદર્શનો અને સામાજિક અશાંતિ વચ્ચે, ઘણી જેલમાંથી કેદીઓ ભાગી ગયા હોવાના અહેવાલો આવ્યા છે. ભારત-નેપાળ સરહદ પર હાઇ એલર્ટ જારી કરવામાં આવ્યું છે, અને SSB તેમજ અન્ય સુરક્ષા દળો કોઈપણ શંકાસ્પદ પ્રવૃત્તિ પર નજર રાખી રહ્યા છે.

  નેપાળની વિવિધ જેલમાંથી 6 હજારથી વધુ કેદીઓ ભાગી ગયા છે. તકનો લાભ લઈને, એકલા સુંધારા જેલમાંથી 3000 થી વધુ કેદીઓ ભાગી ગયા છે. જેલમાં કુલ 3,800 કેદીઓ બંધ હતા અને હવે જેલમાં ફક્ત 500 કેદીઓ બાકી છે.

   નેપાળમાં કેપી શર્મા ઓલીના વડા પ્રધાન પદેથી રાજીનામું આપ્યા પછી પણ રસ્તા પર ઉતરેલા યુવાનોનો ગુસ્સો શાંત થવાનું નામ નથી લઈ રહ્યો. યુવાનો સેનાની બંદૂકો સામે પણ હિંમત દાખવી રહ્યા છે. નેપાળમાં ચાલી રહેલા અશાંતિ અને જેલ તોડવાની ઘટનાઓ વચ્ચે, સશસ્ત્ર સીમા બલ (SSB) એ ભારત-નેપાળ સરહદ પર સિદ્ધાર્થનગર વિસ્તારમાં 5 ફરાર કેદીઓને પકડી પાડ્યા છે. આ કેદીઓ નેપાળની જેલમાંથી ભાગીને ભારતમાં પ્રવેશવાનો પ્રયાસ કરી રહ્યા હતા.