ટોક્યો ૧૨ સપ્ટેમ્બર ૨૦૨૫: પરંપરાગત તોપોનો યુગ હવે પૂરો થયો! જાપાને ઇલેક્ટ્રોમેગ્નેટિક રેલગનનું સફળ પરીક્ષણ કરીને વૈશ્વિક સંરક્ષણ ટેકનોલોજીમાં એક નવી ક્રાંતિ લાવી છે. આ હથિયાર એટલું શક્તિશાળી છે કે તે તોપના ગોળાને બદલે વીજળીની શક્તિથી ધ્વનિની ગતિ કરતાં પણ સાત ગણી વધુ ઝડપે (લગભગ ૮,૦૦૦ કિલોમીટર પ્રતિ કલાક) ફેંકી શકે છે. આ ટેસ્ટિંગ પછી જાપાન યુદ્ધજહાજ પરથી રેલગનનું ફાયરિંગ કરનાર દુનિયાનો પહેલો દેશ બની ગયો છે.

જાપાનના સંરક્ષણ મંત્રાલયની એક્વિઝિશન, ટેકનોલોજી અને લોજિસ્ટિક્સ એજન્સી (ATLA) દ્વારા જાહેર કરાયેલી માહિતી મુજબ, આ 'શોક વેપન'નું પરીક્ષણ જૂન અને જુલાઈ મહિનામાં JS અસુકા નામના જહાજ પર કરવામાં આવ્યું હતું. આ રેલગન મિસાઇલને હવામાં જ તોડી પાડવાની અને દુશ્મનના જહાજોને નષ્ટ કરવાની ક્ષમતા ધરાવે છે, જે તેને ભવિષ્યના યુદ્ધોમાં એક ગેમ-ચેન્જર બનાવે છે.

રસપ્રદ વાત એ છે કે અમેરિકાએ આ ટેકનોલોજી પર અબજો ડોલર ખર્ચ્યા હતા, પરંતુ ખર્ચ અને તકનીકી પડકારોને કારણે ૨૦૨૧માં તેણે આ પ્રોજેક્ટ બંધ કરી દીધો હતો. બીજી તરફ, ચીન પણ આ ટેકનોલોજી પર ઝડપથી કામ કરી રહ્યું છે, પરંતુ હજુ સુધી તેને સક્રિય રીતે ઉપયોગમાં લઈ શક્યું નથી. આ સંજોગોમાં જાપાનની આ સિદ્ધિ ખૂબ જ મોટી અને મહત્વપૂર્ણ ગણાય છે.

સંરક્ષણ નિષ્ણાતો માને છે કે આ રેલગન માત્ર ઝડપી જ નથી, પરંતુ પરંપરાગત મિસાઇલો કરતાં ઘણી સસ્તી પણ છે. જ્યાં એક એર ડિફેન્સ મિસાઇલનો ખર્ચ કરોડોમાં હોય છે, ત્યાં આ રેલગનનું ફાયરિંગ પ્રમાણમાં ઘણું આર્થિક છે. ભવિષ્યમાં આ હથિયારને દરિયાકાંઠાની સુરક્ષા માટે જમીન પર પણ તૈનાત કરવાની જાપાનની યોજના છે. આ વિકાસ સ્પષ્ટ સંકેત આપે છે કે હવે યુદ્ધના મેદાનમાં શક્તિશાળી હથિયારોનો નવો યુગ શરૂ થઈ ચૂક્યો છે.