૧૨ સપ્ટેમ્બર ૨૦૨૫: નેપાળમાં ચાલી રહેલી રાજકીય કટોકટી અને બંધારણીય ગતિરોધ વચ્ચે એક મોટો અને અણધાર્યો વળાંક આવ્યો છે. ઓલી સરકારના પતન બાદ વચગાળાના વડાપ્રધાનની શોધ ચાલી રહી હતી, ત્યારે અચાનક મોડી રાત્રે યોજાયેલી એક ગુપ્ત બેઠકે સમગ્ર રાજકીય સમીકરણ બદલી નાખ્યા છે. આ બેઠકમાં પૂર્વ મુખ્ય ન્યાયાધીશ સુશીલા કાર્કીના નામ પર સર્વસંમતિ સધાઈ છે, અને તેઓ નેપાળના આગામી વડાપ્રધાન બની શકે છે.

સૂત્રોના જણાવ્યા અનુસાર, ગુરુવારે મોડી રાત્રે રાષ્ટ્રપતિ ભવન (શીતલ નિવાસ) ખાતે એક અત્યંત મહત્વપૂર્ણ બેઠક યોજાઈ હતી. જેમાં સેના પ્રમુખ અશોક રાજ સિગ્દેલ, રાષ્ટ્રીય સભાના અધ્યક્ષ નારાયણ દહલ, સર્વોચ્ચ અદાલતના મુખ્ય ન્યાયાધીશ પ્રકાશ સિંહ રાઉત અને ખુદ સુશીલા કાર્કી પણ હાજર રહ્યા હતા. આ બેઠકમાં બંધારણીય નિષ્ણાતો સાથે ચર્ચા કરવામાં આવી હતી અને આખરે દેશનું સુકાન સુશીલા કાર્કીને સોંપવા પર સહમતિ બની હતી.

આ પહેલાં એવી અટકળો હતી કે સુશીલા કાર્કીએ વડાપ્રધાન પદની રેસમાંથી પોતાનું નામ પાછું ખેંચી લીધું છે, પરંતુ મોડી રાત્રે યોજાયેલી આ બેઠક પછી પરિસ્થિતિ સંપૂર્ણપણે બદલાઈ ગઈ છે. આ નવા ડેવલપમેન્ટ પાછળ જન-ઝેડ આંદોલનની મંજૂરી અને કાઠમંડુના લોકપ્રિય મેયર બાલેન શાહનો ટેકો પણ મુખ્ય કારણ ગણાય છે. બાલેન શાહે પોતે વચગાળાના પીએમ બનવાની ઓફરને નકારીને સુશીલા કાર્કીને સમર્થન આપ્યું છે.

હવે સુશીલા કાર્કીને સંસદના ઉપલા ગૃહમાં નામાંકિત કરીને વડાપ્રધાન બનાવવામાં આવશે. આજે, એટલે કે શુક્રવારે આ અંગે સત્તાવાર જાહેરાત થવાની શક્યતા છે. નવી વચગાળાની સરકારને આગામી છ મહિનામાં દેશમાં ચૂંટણીઓ કરાવવાની મહત્વપૂર્ણ જવાબદારી સોંપવામાં આવશે. નેપાળના રાજકારણમાં આ યુ-ટર્ન એક નવો અધ્યાય શરૂ કરી રહ્યો છે, જ્યાં રાજકીય અસ્થિરતાનો અંત લાવવા માટે બંધારણીય અને રાજકીય નેતાઓ એકસાથે આવ્યા છે.