નવી દિલ્હી: ભારતના લોકપાલે એક મહત્વપૂર્ણ ચુકાદો આપતા જણાવ્યું છે કે યુનિયન પબ્લિક સર્વિસ કમિશન (UPSC) ના ગ્રુપ A, B, C, અને D અધિકારીઓ લોકપાલના અધિકારક્ષેત્રમાં આવતા નથી. લોકપાલના અધ્યક્ષ જસ્ટિસ એ.એમ. ખાનવિલકરની અધ્યક્ષતાવાળી ૬ સભ્યોની બેન્ચે યુપીએસસીના સચિવ અને વધારાના સચિવો વિરુદ્ધ દાખલ કરવામાં આવેલી ભ્રષ્ટાચારની ફરિયાદને ફગાવી દેતા આ ચુકાદો આપ્યો.
લોકપાલે અગાઉ ફરિયાદકર્તાને સ્પષ્ટતા કરવા જણાવ્યું હતું કે યુપીએસસીના અધિકારીઓ લોકપાલ અને લોકાયુક્ત અધિનિયમની કલમ ૧૪ હેઠળ કેવી રીતે આવરી લેવાય છે, કારણ કે યુપીએસસીની સ્થાપના સંસદના અધિનિયમથી નહીં, પરંતુ સીધા બંધારણ દ્વારા કરવામાં આવી છે.
ફરિયાદકર્તાએ સોગંદનામું દાખલ કરી દલીલ કરી હતી કે યુપીએસસીના સચિવ અને વધારાના સચિવ કેન્દ્ર સરકારના ‘ગ્રુપ એ’ અધિકારીઓ છે, તેથી તેઓ લોકપાલના અધિકારક્ષેત્ર હેઠળ આવે છે. જોકે, લોકપાલે તેના આદેશમાં સ્પષ્ટ કર્યું કે કલમ ૧૪ હેઠળ માત્ર એવા અધિકારીઓ જ તેના અધિકારક્ષેત્રમાં આવે છે જેઓ “સંઘના કાર્યો” (affairs of the Union) સાથે સંબંધિત સેવાઓમાં હોય.
લોકપાલે જણાવ્યું કે, આ મામલામાં યુપીએસસીના અધિકારીઓ પરના આરોપો તેમના આયોગ સાથે સંબંધિત કાર્યો માટે હતા, “સંઘના કાર્યો” માટે નહીં. તેથી, તેઓ લોકપાલના અધિકારક્ષેત્ર હેઠળ આવતા નથી. આ ચુકાદા સાથે ફરિયાદને રદ્દ કરવામાં આવી હતી, અને ફરિયાદકર્તાને અન્ય કોઈ કાયદા હેઠળ યોગ્ય ઉપાયો શોધવાની સ્વતંત્રતા આપવામાં આવી છે.