નવી દિલ્‍હીઃ શનિવારે લંડનના રસ્તાઓ પર હજારો લોકો એક જ વ્યક્તિના સમર્થન અને વિરોધમાં નીકળ્યા હતા . ' યુનાઇટ ધ કિંગડમ ' નામની આ રેલીમાં વાતાવરણ એટલું ગરમાયું હતું કે ભીડને કાબૂમાં લેવા માટે પોલીસને ખાસ વ્યવસ્થા કરવી પડી હતી . આ કૂચ કોઈ રાજકીય પક્ષ કે સરકાર માટે નહોતી , પરંતુ એક વિવાદાસ્પદ વ્યક્તિ - ટોમી રોબિન્સન માટે હતી, તો હવે સવાલ થાય છે કે આ વ્યક્તિ કોણ છે જેના માટે લંડનમાં આટલો બધો ઉહાપોહ સર્જાયો હતો.

ટોમી રોબિન્સનનું સાચું નામ સ્ટીફન ક્રિસ્ટોફર યાક્સલી-લેનન છે. તેમને બ્રિટનમાં એક જાણીતા જમણેરી કાર્યકર્તા માનવામાં આવે છે. રોબિન્સને 2009 માં ઇંગ્લિશ ડિફેન્સ લીગ (EDL) નામનું સંગઠન બનાવ્યું હતું . આ સંગઠન મુસ્લિમ વિરોધી નિવેદનો અને વિરોધ પ્રદર્શનો સાથે સંકળાયેલું છે. તેમની છાપ હંમેશા એક એવા નેતાની રહી છે જે ઇમિગ્રન્ટ્સ અને ખાસ કરીને મુસ્લિમ સમુદાય વિશે તીક્ષ્ણ નિવેદનો આપતા રહ્યા છે.

રોબિન્સનનું નામ હંમેશા વિવાદો સાથે જોડાયેલું રહ્યું છે . તેમના પર ઘણી વખત દ્વેષપૂર્ણ ભાષણ અને હિંસા ભડકાવવાનો આરોપ મૂકવામાં આવ્યો છે. કોર્ટના તિરસ્કારના કેસમાં તેમને જેલમાં પણ જવું પડ્યું હતું. સોશિયલ મીડિયા પ્લેટફોર્મ પર તેમની લોકપ્રિયતા ખૂબ જ વધારે છે, પરંતુ દ્વેષપૂર્ણ સામગ્રીને કારણે તેમના એકાઉન્ટ્સ પર વારંવાર પ્રતિબંધ મૂકવામાં આવ્યો છે. આ હોવા છતાં, રોબિન્સન પોતાને "વાણી સ્વતંત્રતાનો યોદ્ધા" કહે છે અને દાવો કરે છે કે તેઓ એ જ સત્ય બહાર લાવી રહ્યા છે જેને મીડિયા દબાવી રહ્યું છે.

41 વર્ષીય ટોમી રોબિન્સને એ વાતનો સ્વીકાર કર્યો છે કે તેણે દાનમાં મળેલા પૈસા દારુ અને પાર્ટીઓમાં ઉડાવી દીધાં હતા. 2021 માં, તેમણે નાદારી જાહેર કરી અને જાહેર કર્યું કે તેમણે લાખો પાઉન્ડના દાનમાં મોટી રકમનો જુગાર રમ્યો છે. આ બધા ગુનાઓનો સ્વીકાર કરવાં છતાં પણ તે ખૂબ લોકપ્રિય બન્યો હતો.

રોબિન્સન લાંબો ગુનાહિત ઈતિહાસ પણ ધરાવે છે તેના પર હુમલો, બંધક બનાવવા, છેતરપિંડી અને કોર્ટના તિરસ્કારના અનેક કેસ નોંધાયેલા છે. 2024માં, તેને હાઇકોર્ટના આદેશનો અનાદર કરવા બદલ 18 મહિનાની જેલની સજા ફટકારવામાં આવી હતી.