મહારાષ્ટ્રના જાલના જિલ્લામાં અનેક ઓબીસી, આદિવાસી અને બંજારા સમુદાયના સંગઠનોએ આજે જણાવ્યું હતું કે જ્યાં સુધી રાજ્ય સરકાર કાર્યકર્તા મનોજ જરાંગે દ્વારા મુંબઈમાં થયેલા આંદોલનને પગલે જારી કરાયેલ મરાઠા ક્વોટા જીઆર પાછો ખેંચી લે નહીં ત્યાં સુધી તેઓ વિરોધ પ્રદર્શનો કરશે.

મરાઠા સમુદાયના સભ્યોને કુણબી જાતિ પ્રમાણપત્રો અને તેથી ક્વોટા મેળવવાની મંજૂરી આપવા માટે હૈદરાબાદ ગેઝેટ લાગુ કરવાથી એસસી, એસટી અને અન્ય પછાત વર્ગો પર ભારે અસર પડશે. કુણબીઓ – એક કૃષિ સમુદાય, મહારાષ્ટ્રમાં ઓબીસી વર્ગનો ભાગ છે. અમને અનુસૂચિત જનજાતિ તરીકે વર્ગીકૃત કરવામાં આવ્યા હતા અને હૈદરાબાદ રાજ્યમાં અનામત આપવામાં આવી હતી. અમે ઇચ્છીએ છીએ કે સમાન અધિકારો પુનઃસ્થાપિત થાય, એમ બંજારા સંગઠન ગોર સેનાના પ્રમુખ સંદેશ ચવ્હાણે જણાવ્યું હતું. ચવ્હાણે એવો પણ દાવો કર્યો હતો કે ધારાશિવના ૩૨ વર્ષીય બંજારા સ્નાતકે શનિવારે આત્મહત્યા કરી હતી અને તેણે એસટી અનામતની માંગ કરતી એક નોંધ છોડી દીધી હતી.

૧૧ સપ્ટેમ્બરથી બંજારા યુવાનો જાલના કલેક્ટર ઓફિસની બહાર અનિશ્ચિત સમય માટે ભૂખ હડતાળ પર છે, જ્યારે વરિષ્ઠ નેતા હરિભાઉ રાઠોડે ૧૫ સપ્ટેમ્બરે જાલના અને બીડમાં મોરચાની જાહેરાત કરી છે. જોકે, આદિવાસી સંગઠનોએ બંજારા સમુદાયની આ માંગનો વિરોધ કર્યો છે અને દાવો કર્યો છે કે વિમુક્ત જાતિ અને વિચરતી જનજાતિ (વિજેએનટી) વિભાગ હેઠળ તેઓ ૩ ટકા ક્વોટાનો લાભ પહેલાથી જ મેળવે છે.

ઓબીસી કાર્યકરો નવનાથ વાઘમારે અને સતુસંગ મુંધેએ ચેતવણી આપી હતી કે ક્વોટાનો વિસ્તાર કરવાથી ઓબીસી શ્રેણી હેઠળ પહેલાથી જ સૂચિબદ્ધ ૩૭૪ જાતિઓના અધિકારો જોખમમાં મૂકાશે. ઓબીસી નેતાઓએ ૧૦ ઓક્ટોબરે નાગપુરમાં એક વિશાળ મોરચો યોજવાનો નિર્ણય લીધો છે, એમ તેમણે ઉમેર્યું.

ઐતિહાસિક રીતે મરાઠાવાડા પ્રદેશ હૈદરાબાદના નિઝામ હેઠળ હતો, જેના વહીવટીતંત્રે ગેઝેટમાં જાતિઓ અને વ્યવસાયોનું દસ્તાવેજીકરણ કર્યું હતું. ૧૯૧૮માં મરાઠાઓને શિક્ષણ અને નોકરીઓમાં અનામત આપવામાં આવી હતી, જેનો ઉપયોગ હવે તેમના ઓબીસી દાવાને સમર્થન આપવા માટે કરવામાં આવી રહ્યો છે. તે સમયે, નિઝામે ૧૭ જિલ્લા પર શાસન કર્યું હતું, જેમાંથી પાંચ, એટલે કે ઔરંગાબાદ, બીડ, નાંદેડ, પરભણી અને ઉસ્માનાબાદ, પાછળથી મહારાષ્ટ્રનો ભાગ બન્યા.

નોંધનીય છે કે મરાઠા ક્રાંતિ મોરચાના રાજ્ય સંયોજક સંજય લાખે પાટીલે પણ જરાંગે સામે અવાજ ઉઠાવ્યો છે અને દાવો કર્યો છે કે તેમને ગેઝેટનું કોઈ “ઊંડું જ્ઞાન” નથી. “ફક્ત કુણબી રેકોર્ડ ધરાવતા મરાઠાઓને જ ફાયદો થશે. સરકાર મરાઠાઓને છેતરી રહી છે,” તેમણે આરોપ લગાવ્યો