15 સપ્ટેમ્બર, 2025: દિલ્હીના કેન્ટ વિસ્તારમાં થયેલા એક ગમખ્વાર BMW અકસ્માતમાં એક નવો વળાંક આવ્યો છે. આ દુર્ઘટનામાં પોતાનો જીવ ગુમાવનાર નવજોત સિંહની પત્ની સંદીપ કૌરના નિવેદન બાદ પોલીસે આરોપી ગગનપ્રીત કૌરની ધરપકડ કરી છે. પોલીસે ગગનપ્રીતને હોસ્પિટલમાંથી રજા મળ્યા બાદ કસ્ટડીમાં લીધી છે અને તેની સામે પુરાવાઓનો નાશ કરવા અને છુપાવવાની કલમો પણ ઉમેરી છે.

આરોપોની સઘન તપાસ: કડક કાર્યવાહીના સંકેત
પોલીસ તપાસમાં કેટલાક ચોંકાવનારા તથ્યો સામે આવ્યા છે. અકસ્માત બાદ ગગનપ્રીત ઘાયલ દંપતીને નજીકની હોસ્પિટલને બદલે લગભગ 19 કિલોમીટર દૂર આવેલી હોસ્પિટલમાં લઈ ગઈ હતી. પોલીસ સૂત્રોના જણાવ્યા અનુસાર, આ હોસ્પિટલ કથિત રીતે ગગનપ્રીત કૌરના કોઈ પરિચિતની છે. આ બાબત પરથી એવું અનુમાન લગાવવામાં આવી રહ્યું છે કે પુરાવાઓને છુપાવવાનો પ્રયાસ કરવામાં આવ્યો હતો.

પત્નીના નિવેદનથી સમગ્ર મામલો ઊજાગર થયો
દુર્ઘટનામાં ગંભીર રીતે ઘાયલ થયેલા સંદીપ કૌરે જણાવ્યું કે તે અને તેના પતિ બાઇક પર ઘરે જઈ રહ્યા હતા ત્યારે એક તેજ ગતિએ આવતી વાદળી BMWએ તેમને પાછળથી ટક્કર મારી. ટક્કર એટલી જોરદાર હતી કે બંને રસ્તા પર પડી ગયા. નવજોત સિંહને માથા અને ચહેરા પર ગંભીર ઈજાઓ થઈ, જ્યારે સંદીપ કૌરને ફ્રેક્ચર અને અન્ય ઈજાઓ થઈ. સંદીપ કૌરે આરોપ લગાવ્યો છે કે વારંવાર વિનંતી કરવા છતાં ગગનપ્રીત તેમને નજીકની હોસ્પિટલમાં લઈ જવાને બદલે દૂર લઈ ગઈ.

સાક્ષીનું નિવેદન પણ શંકા ઊભી કરે છે
અકસ્માતના સાક્ષી ગુલફામના નિવેદનથી પણ શંકાસ્પદ બાબતો બહાર આવી છે. તેણે જણાવ્યું કે ગગનપ્રીત અકસ્માતના 10 મિનિટ પહેલા જ હોસ્પિટલમાં ફોન કરીને ડોક્ટરોને તૈયાર રહેવા જણાવ્યું હતું. આ બાબત પોલીસ માટે તપાસનો વિષય બની છે. પોલીસ હવે એ દિશામાં તપાસ કરી રહી છે કે શું ગગનપ્રીતે જાણીજોઈને નજીકની હોસ્પિટલને બદલે દૂરની હોસ્પિટલ પસંદ કરી? અકસ્માત સમયે કારમાં બીજું કોણ હાજર હતું? અને હોસ્પિટલમાં અગાઉથી જાણ કરવાનો શું હેતુ હતો? આ સમગ્ર મામલાની વધુ તપાસ ચાલી રહી છે.