ટેક્સાસ, યુએસ:  અમેરિકાના ટેક્સાસ રાજ્યના ડલ્લાસ શહેરમાં એક અત્યંત ક્રૂર અને આઘાતજનક ઘટના સામે આવી છે. અહીં એક ક્યુબન ઘુસણખોર દ્વારા ભારતીય મૂળના વ્યક્તિ ચંદ્ર નાગમલ્લૈયાની માથું કાપીને હત્યા કરવામાં આવી છે. આ ઘટનાથી અમેરિકામાં ભારતીય સમુદાયમાં ભય અને આક્રોશનો માહોલ છે.

ઘટનાનું કારણ અને વિગતો
પોલીસના જણાવ્યા અનુસાર, આરોપી યોર્ડાનિસ કોબોસ-માર્ટિનેઝ (37) પણ એ જ મોટેલમાં કામ કરતો હતો. મૃતક નાગમલ્લૈયાએ આરોપી અને તેની મહિલા સાથીદારને ખામીયુક્ત વોશિંગ મશીનનો ઉપયોગ ન કરવા કહ્યું હતું, જેના પર થયેલા વિવાદે આ હત્યાનું સ્વરૂપ લીધું. ગુસ્સે ભરાયેલા માર્ટિનેઝે નાગમલ્લૈયાનું ગળું કાપી નાખ્યું અને ત્યારબાદ તેના કપાયેલા માથા સાથે ફૂટબોલ રમ્યો હોવાનું પણ સામે આવ્યું છે.

ટ્રમ્પની આકરી પ્રતિક્રિયા
આ ઘટના પર અમેરિકી રાષ્ટ્રપતિ ડોનાલ્ડ ટ્રમ્પએ આકરી પ્રતિક્રિયા આપી છે. તેમણે કહ્યું કે, "અમારા દેશમાં આવું ન થવું જોઈતું હતું. આ વ્યક્તિ ક્યુબાથી અહીં ભાગી ગયો હતો અને તે એક રીઢો ગુનેગાર છે." ટ્રમ્પે આ માટે બિડેન વહીવટીતંત્રની ગેરકાયદેસર ઇમિગ્રેશન નીતિઓને જવાબદાર ઠેરવી. તેમણે ભારપૂર્વક જણાવ્યું કે તેમના કાર્યકાળ દરમિયાન ગેરકાયદેસર ઇમિગ્રન્ટ્સને છોડવામાં આવશે નહીં અને અમેરિકાને સુરક્ષિત બનાવવા માટે પ્રતિબદ્ધ છે.

આ કેસમાં આરોપી માર્ટિનેઝની ધરપકડ કરવામાં આવી છે અને તેની સામે ફર્સ્ટ-ડિગ્રી હત્યાનો કેસ દાખલ કરવામાં આવ્યો છે.